kisi ehsas mein pahli si ab shiddat nahin hoti

kisī ehsās meñ pahlī sī ab shiddat nahīñ hotī

ki ab to dil ke sannāTe se bhī vahshat nahīñ hotī

zamāne-bhar ke ġham apnā liye haiñ ḳhud-farebī meñ

ḳhud apne ġham se milne kī hameñ fursat nahīñ hotī

guzar jaatī hai saarī zindagī jin ke ta.āqub meñ

bagūle haiñ kisī bhī ḳhvāb kī sūrat nahīñ hotī

qasam khaa.ī hai ham ne bārhā ḳhāmosh rahne kī

magar ghuT-ghuT ke rahne kī abhī aadat nahīñ hotī

use maiñ āgahī kā faiz samjhūñ yā sazā samjhūñ

hameñ duniyā kī nairañgī pe ab hairat nahīñ hotī

jahāñ par makr-o-fan ādāb-e-mahfil ban ke chhāyā ho

hameñ aisī kisī mahfil se kuchh nisbat nahīñ hotī

hazāroñ an-kahī bāteñ jinheñ likhne ko jī chāhe

kabhī himmat nahīñ hotī kabhī fursat nahīñ hotī

kisi ehsas mein pahli si ab shiddat nahin hoti

ki ab to dil ke sannaTe se bhi wahshat nahin hoti

zamane-bhar ke gham apna liye hain KHud-farebi mein

KHud apne gham se milne ki hamein fursat nahin hoti

guzar jati hai sari zindagi jin ke taaqub mein

bagule hain kisi bhi KHwab ki surat nahin hoti

qasam khai hai hum ne barha KHamosh rahne ki

magar ghuT-ghuT ke rahne ki abhi aadat nahin hoti

use main aagahi ka faiz samjhun ya saza samjhun

hamein duniya ki nairangi pe ab hairat nahin hoti

jahan par makr-o-fan aadab-e-mahfil ban ke chhaya ho

hamein aisi kisi mahfil se kuchh nisbat nahin hoti

hazaron an-kahi baaten jinhen likhne ko ji chahe

kabhi himmat nahin hoti kabhi fursat nahin hoti