kisi fasad na koi tabah-kari mein

kisī fasād na koī tabāh-kārī meñ

kaTī hai umr mohabbat kī ābyārī meñ

chale haiñ ab vo gulāboñ kī khetiyāñ karne

sharīk hote the kal tak jo sang-bārī meñ

zamāna ulTe ma.ānī nikāl letā hai

ab ehtiyāt bhī lāzim hai ḳhāksārī meñ

vo apne lams kī ḳhushbū bhī rakh gayā is meñ

khile the phuul jo ik roz dil kī kyārī meñ

maiñ us ko niiñd kā hissa banā.ūñ bhī kaise

ab us ke ḳhvāb bhī aate nahīñ savārī meñ

ye baat sach hai ki ajdād bādshāh the magar

gine to jaate haiñ ham log ab bhikārī meñ

chal us ke hijr meñ ab qahqahe lagā 'dilbar'

guzārā vaqt bahut tū ne āh-o-zārī meñ

kisi fasad na koi tabah-kari mein

kaTi hai umr mohabbat ki aabyari mein

chale hain ab wo gulabon ki khetiyan karne

sharik hote the kal tak jo sang-bari mein

zamana ulTe maani nikal leta hai

ab ehtiyat bhi lazim hai KHaksari mein

wo apne lams ki KHushbu bhi rakh gaya is mein

khile the phul jo ek roz dil ki kyari mein

main us ko nind ka hissa banaun bhi kaise

ab us ke KHwab bhi aate nahin sawari mein

ye baat sach hai ki ajdad baadshah the magar

gine to jate hain hum log ab bhikari mein

chal us ke hijr mein ab qahqahe laga 'dilbar'

guzara waqt bahut tu ne aah-o-zari mein