kisi jalwa-gah-e-majaz mein kahin rah gaya

kisī jalva-gāh-e-majāz meñ kahīñ rah gayā

maiñ tire badan kī namāz meñ kahīñ rah gayā

ka.ī aur farz bhī the jabīn-e-nahīf par

mirā zauq ijz-o-niyāz meñ kahīñ rah gayā

jahāñ manziloñ kī lapak thī chashm-e-fareb meñ

maiñ unhī nasheb-o-farāz meñ kahīñ rah gayā

mire harf-e-girya-kunāñ meñ aisī girah paḌī

mirā naġhma soz-e-hijāz meñ kahīñ rah gayā

paḌī aisī zarb-e-gumān raḳht-e-yaqīn par

ki maiñ rāh-e-dūr-darāz meñ kahīñ rah gayā

mujhe niiñd aa.egī ḳhvāb-gāh-e-jahāñ meñ kyā

mirā dil to mahfil-e-nāz meñ kahīñ rah gayā

kisī lab pe gosha-nashīñ thā harf-e-sahar mirā

jo navā-e-shab ke gudāz meñ kahīñ rah gayā

mujhe apnī koī ḳhabar na thī tire dhyān meñ

mirā ishq ḳhū-e-ayāz meñ kahīñ rah gayā

maiñ magan thā aisā jahān-e-ġham ke tavāf meñ

mirā sab junūñ tag-o-tāz meñ kahīñ rah gayā

vo jo ek va.ada-e-shauq thā tirī diid kā

kisī chashm-e-hīla-tarāz meñ kahīñ rah gayā

mire bhed ifshā hue na ujlat-e-vaqt se

maiñ navā-e-kun hī ke raaz meñ kahīñ rah gayā

kisi jalwa-gah-e-majaz mein kahin rah gaya

main tere badan ki namaz mein kahin rah gaya

kai aur farz bhi the jabin-e-nahif par

mera zauq ijz-o-niyaz mein kahin rah gaya

jahan manzilon ki lapak thi chashm-e-fareb mein

main unhi nasheb-o-faraaz mein kahin rah gaya

mere harf-e-girya-kunan mein aisi girah paDi

mera naghma soz-e-hijaz mein kahin rah gaya

paDi aisi zarb-e-guman raKHt-e-yaqin par

ki main rah-e-dur-daraaz mein kahin rah gaya

mujhe nind aaegi KHwab-gah-e-jahan mein kya

mera dil to mahfil-e-naz mein kahin rah gaya

kisi lab pe gosha-nashin tha harf-e-sahar mera

jo nawa-e-shab ke gudaz mein kahin rah gaya

mujhe apni koi KHabar na thi tere dhyan mein

mera ishq KHu-e-ayaz mein kahin rah gaya

main magan tha aisa jahan-e-gham ke tawaf mein

mera sab junun tag-o-taz mein kahin rah gaya

wo jo ek wada-e-shauq tha teri did ka

kisi chashm-e-hila-taraaz mein kahin rah gaya

mere bhed ifsha hue na ujlat-e-waqt se

main nawa-e-kun hi ke raaz mein kahin rah gaya