kisi ka KHat hai ya ye ghazal hai ye kaisa parcha paDa hua hai

kisī kā ḳhat hai yā ye ġhazal hai ye kaisā parcha paḌā huā hai

gulāl se lab bane haiñ is meñ kitāb chehra banā huā hai

nigāh us kī hai jhiil jaisī kamān jaisī bhavoñ ke nīche

to surḳh hoñToñ ke ek jānib bhī til kā pahra lagā huā hai

haañ sabz qindīl jal rahī hai balā kī surḳhī ubal rahī hai

adā se palkeñ jhukī huiiñ haiñ hayā kā āñchal paḌā huā hai

lo ab hamārī saqīl āñkheñ qadīm rastoñ pe chal paḌī haiñ

vafā ke khañDar se kuchh pare hī hamārā malba paḌā huā hai

safed bāloñ ke pīchhe apnī javān umrī ke pal nahīñ haiñ

hai ahd-e-tiflī kā ek būḌhā jo laḌkhaḌātā khaḌā huā hai

bahut hasīñ hai ye sachchā motī jo rañg se is ke munsalik hai

magar use ye ḳhabar nahīñ hai hamārā aañsū juḌā huā hai

hai chaap us kī hamārī dhaḌkan jo dil meñ dhak dhak lagī huī hai

firāq us kā visāl hī hai vo ban ke dhaḌkā lagā huā hai

bahut sañvārā musavviroñ ne bahut se Daale haiñ rañg is meñ

magar ye sūrat hai merī sūrat so rañg is kā uḌā huā hai

kisi ka KHat hai ya ye ghazal hai ye kaisa parcha paDa hua hai

gulal se lab bane hain is mein kitab chehra bana hua hai

nigah us ki hai jhil jaisi kaman jaisi bhawon ke niche

to surKH honTon ke ek jaanib bhi til ka pahra laga hua hai

han sabz qindil jal rahi hai bala ki surKHi ubal rahi hai

ada se palken jhuki huin hain haya ka aanchal paDa hua hai

lo ab hamari saqil aankhen qadim raston pe chal paDi hain

wafa ke khanDar se kuchh pare hi hamara malba paDa hua hai

safed baalon ke pichhe apni jawan umri ke pal nahin hain

hai ahd-e-tifli ka ek buDha jo laDkhaData khaDa hua hai

bahut hasin hai ye sachcha moti jo rang se is ke munsalik hai

magar use ye KHabar nahin hai hamara aansu juDa hua hai

hai chap us ki hamari dhaDkan jo dil mein dhak dhak lagi hui hai

firaq us ka visal hi hai wo ban ke dhaDka laga hua hai

bahut sanwara musawwiron ne bahut se Dale hain rang is mein

magar ye surat hai meri surat so rang is ka uDa hua hai