kisi ka nam jo leta hun aah karta hun

kisī kā naam jo letā huuñ aah kartā huuñ

tamām raat yahī ik gunāh kartā huuñ

nigāh-e-barq kā ehsān kab gavārā hai

maiñ ḳhud hī apnā nasheman tabāh kartā huuñ

ye rabt-e-sho.ala-o-shabnam nahīñ to phir kyā hai

maiñ ashk-e-ġham kī tabassum kī chaah kartā huuñ

tū mai-kashī se mujhe roktā hai kyoñ zāhid

maiñ imtiyāz-e-safed-o-siyāh kartā huuñ

dikhā.ī detā hai dhuñdlā sā hasratoñ kā mazār

maiñ ahd-e-rafta pe jab bhī nigāh kartā huuñ

tumhāre husn kī daulat se bhiik le le kar

dil-e-faqīr ko maiñ bādshāh kartā huuñ

kisī ke lutf kā hāmil nahīñ mazāq 'hayāt'

isī liye maiñ sitam se nibāh kartā huuñ

kisi ka nam jo leta hun aah karta hun

tamam raat yahi ek gunah karta hun

nigah-e-barq ka ehsan kab gawara hai

main KHud hi apna nasheman tabah karta hun

ye rabt-e-shoala-o-shabnam nahin to phir kya hai

main ashk-e-gham ki tabassum ki chah karta hun

tu mai-kashi se mujhe rokta hai kyon zahid

main imtiyaz-e-safed-o-siyah karta hun

dikhai deta hai dhundla sa hasraton ka mazar

main ahd-e-rafta pe jab bhi nigah karta hun

tumhaare husn ki daulat se bhik le le kar

dil-e-faqir ko main baadshah karta hun

kisi ke lutf ka hamil nahin mazaq 'hayat'

isi liye main sitam se nibah karta hun