kisi ka shisha-e-dil toD kar jaya nahin karte

kisī kā shīsha-e-dil toḌ kar jaayā nahīñ karte

makīn-e-dil makāñ ko is tarah Dhāyā nahīñ karte

tum apne āñsūoñ ko rok lete apnī palkoñ par

kisī kā rāz-e-ġham ġhairoñ se khulvāyā nahīñ karte

ham ahl-e-dil haiñ dastūr-e-vafā se ḳhuub vāqif haiñ

taḌap kar jaan de dete haiñ taḌpāyā nahīñ karte

ye ġham to ārzūoñ kī hasīñ sauġhāt hai ai dil

to phir hangāma-hā-e-ġham se ghabrāyā nahīñ karte

kisī kā rāz-e-dard-e-dil chhupānā shart-e-ulfat hai

to us ko dekh kar mahfil meñ chhup jaayā nahīñ karte

usī be-dard kā ġham had se jab baḌh jaa.e hai ai dil

to sher az-ḳhud chale aate haiñ ham laayā nahīñ karte

na khul jaa.eñ kahīñ asrār-e-sar-basta sar-e-mahfil

ham un kī anjuman meñ is liye jaayā nahīñ karte

shamīm aao tumheñ ādāb-e-gulshan ham batāte haiñ

nikal kar barg-e-gul se gul ko Thukrāyā nahīñ karte

'sahar' kā dil hai ye bāzīcha-e-tiflāñ nahīñ pyāre

khilaune se tamannāoñ ko bahlāyā nahīñ karte

kisi ka shisha-e-dil toD kar jaya nahin karte

makin-e-dil makan ko is tarah Dhaya nahin karte

tum apne aansuon ko rok lete apni palkon par

kisi ka raaz-e-gham ghairon se khulwaya nahin karte

hum ahl-e-dil hain dastur-e-wafa se KHub waqif hain

taDap kar jaan de dete hain taDpaya nahin karte

ye gham to aarzuon ki hasin saughat hai ai dil

to phir hangama-ha-e-gham se ghabraya nahin karte

kisi ka raaz-e-dard-e-dil chhupana shart-e-ulfat hai

to us ko dekh kar mahfil mein chhup jaya nahin karte

usi be-dard ka gham had se jab baDh jae hai ai dil

to sher az-KHud chale aate hain hum laya nahin karte

na khul jaen kahin asrar-e-sar-basta sar-e-mahfil

hum un ki anjuman mein is liye jaya nahin karte

shamim aao tumhein aadab-e-gulshan hum batate hain

nikal kar barg-e-gul se gul ko Thukraya nahin karte

'sahar' ka dil hai ye bazicha-e-tiflan nahin pyare

khilaune se tamannaon ko bahlaya nahin karte