kisi ke chehra-e-zartar ke sabab mil jaen

kisī ke chehra-e-zartār ke sabab mil jaa.eñ

ye sang-e-hijr haTe aur māh-e-lab mil jaa.eñ

kabhī mile na talab par tirī udāsī bhī

kabhī ye sābit-o-sayyār be-talab mil jaa.eñ

mire chhalakne se bhar jaa.e kā.enāt kā jaam

mire piyāla-e-dil meñ ye roz-o-shab mil jaa.eñ

vahāñ dimāġh-e-takallum yahāñ ġhurūr-e-suḳhan

ajab nahīñ jo kahīñ ham se be-adab mil jaa.eñ

jahāñ-panāh se isrār-e-bāryābī kyā

ho un ko jab bhī farāġhat vo ham se tab mil jaa.eñ

zamīñ kā lams-e-mulā.em falak kā ā.īna

maiñ apnī samt jo palTūñ to sab ke sab mil jaa.eñ

koī pukāre hameñ kahkashāñ kī vus.at se

koī kahe ki chalo yūñhī be-talab mil jaa.eñ

kisi ke chehra-e-zartar ke sabab mil jaen

ye sang-e-hijr haTe aur mah-e-lab mil jaen

kabhi mile na talab par teri udasi bhi

kabhi ye sabit-o-sayyar be-talab mil jaen

mere chhalakne se bhar jae kaenat ka jam

mere piyala-e-dil mein ye roz-o-shab mil jaen

wahan dimagh-e-takallum yahan ghurur-e-suKHan

ajab nahin jo kahin hum se be-adab mil jaen

jahan-panah se israr-e-baryabi kya

ho un ko jab bhi faraghat wo hum se tab mil jaen

zamin ka lams-e-mulaem falak ka aaina

main apni samt jo palTun to sab ke sab mil jaen

koi pukare hamein kahkashan ki wusat se

koi kahe ki chalo yunhi be-talab mil jaen