kisi ke chehre ki tabindagi ko kya kahiye

kisī ke chehre kī tābindagī ko kyā kahiye

phir us pe zulf kī us barhamī ko kyā kahiye

ye kyā jagah hai ki pursān-e-hāl koī nahīñ

yahāñ ke logoñ kī is be-ruḳhī ko kyā kahiye

nuqūsh-e-husn ubharte rahe haiñ zehn meñ kyoñ

tasavvurāt kī is āzarī ko kyā kahiye

na ho sukūn to phir lutf-e-zindagī kyā hai

jahāñ sukūn ho us zindagī ko kyā kahiye

nahīñ hai merī nigāhoñ ko tāb-e-nazzāra

kisī ke husn kī us ḳhīrgī ko kyā kahiye

ḳhud apne des meñ pāmāl ho gayā hai koī

chaman meñ phuul kī be-hurmatī ko kyā kahiye

kalī ko kar hī diyā be-hijāb ai 'ḳhāvar'

nasīm-e-sub.h kī be-rah-ravī ko kyā kahiye

kisi ke chehre ki tabindagi ko kya kahiye

phir us pe zulf ki us barhami ko kya kahiye

ye kya jagah hai ki pursan-e-haal koi nahin

yahan ke logon ki is be-ruKHi ko kya kahiye

nuqush-e-husn ubharte rahe hain zehn mein kyon

tasawwuraat ki is aazari ko kya kahiye

na ho sukun to phir lutf-e-zindagi kya hai

jahan sukun ho us zindagi ko kya kahiye

nahin hai meri nigahon ko tab-e-nazzara

kisi ke husn ki us KHirgi ko kya kahiye

KHud apne des mein pamal ho gaya hai koi

chaman mein phul ki be-hurmati ko kya kahiye

kali ko kar hi diya be-hijab ai 'KHawar'

nasim-e-subh ki be-rah-rawi ko kya kahiye