kisi ke dast-e-inayat ka wo diya hun main

kisī ke dast-e-ināyat kā vo diyā huuñ maiñ

jalā diyā hai kisī ne sulag rahā huuñ maiñ

dayār-e-lutf meñ aisā shikasta-pā huuñ maiñ

lipaT ke kāñToñ se ro.e vo aabla huuñ maiñ

mujhe mirī hī ri.āyat ne kar diyā mahrūm

pakaḌ pakaḌ ke jo dāman ko chhoḌtā huuñ maiñ

mujhī meñ kaun ḳhatā hai ki jo kisī meñ nahīñ

ik aadmī huuñ yahī bas na aur kyā huuñ maiñ

thake hue haiñ mire hausle kahāñ chal ke

zarā sā ruk ke yahāñ saañs le rahā huuñ maiñ

sanam-kadoñ kī na paḌ jaa.e har jagah buniyād

jigar ke TukḌe zamīñ par bikhertā huuñ maiñ

gayā to bhuul gayā koī dard-e-zaḳhm kā haal

vo kashmakash hai ki ġham se lipaT rahā huuñ maiñ

kisi ke dast-e-inayat ka wo diya hun main

jala diya hai kisi ne sulag raha hun main

dayar-e-lutf mein aisa shikasta-pa hun main

lipaT ke kanTon se roe wo aabla hun main

mujhe meri hi riayat ne kar diya mahrum

pakaD pakaD ke jo daman ko chhoDta hun main

mujhi mein kaun KHata hai ki jo kisi mein nahin

ek aadmi hun yahi bas na aur kya hun main

thake hue hain mere hausle kahan chal ke

zara sa ruk ke yahan sans le raha hun main

sanam-kadon ki na paD jae har jagah buniyaad

jigar ke TukDe zamin par bikherta hun main

gaya to bhul gaya koi dard-e-zaKHm ka haal

wo kashmakash hai ki gham se lipaT raha hun main