kisi ke dil mein sozish ho rahi hai

kisī ke dil meñ sozish ho rahī hai

agar merī satā.ish ho rahī hai

koī mere liye mahv-e-duā hai

kahīñ sāzish pe sāzish ho rahī hai

hamīñ par kyoñ zamāne-bhar kī āḳhir

har ik jānib se bandish ho rahī hai

mire ahbāb parda Dālte haiñ

barābar mujh se laġhzish ho rahī hai

abhī to ishq kī ye ibtidā hai

tirī āñkhoñ se bārish ho rahī hai

kisī kī yaad meñ jaagī huī haiñ

mirī āñkhoñ meñ sozish ho rahī hai

laboñ par baat dil kī aa na paa.ī

nigāhoñ se guzārish ho rahī hai

ta.affun dekh kar shahroñ kā 'ajmal'

bayābānī kī ḳhvāhish ho rahī hai

kisi ke dil mein sozish ho rahi hai

agar meri sataish ho rahi hai

koi mere liye mahw-e-dua hai

kahin sazish pe sazish ho rahi hai

hamin par kyon zamane-bhar ki aaKHir

har ek jaanib se bandish ho rahi hai

mere ahbab parda Dalte hain

barabar mujh se laghzish ho rahi hai

abhi to ishq ki ye ibtida hai

teri aankhon se barish ho rahi hai

kisi ki yaad mein jagi hui hain

meri aankhon mein sozish ho rahi hai

labon par baat dil ki aa na pai

nigahon se guzarish ho rahi hai

taffun dekh kar shahron ka 'ajmal'

bayabani ki KHwahish ho rahi hai