kisi ke dukh se na kar sukh kashid tauba kar

kisī ke dukh se na kar sukh kashīd tauba kar

ubhar na vaqt kā ban kar yazīd tauba kar

fasīl-e-zāt se bāhar nikal ki ye duniyā

tire bharam se hai mutlaq ba.iid tauba kar

nigāh-e-shauq ko jalve se yuuñ na rakh mahrūm

hai shirk jur.at-e-inkār-e-dīd tauba kar

ki nazm-e-mai-kada rindoñ kī taab lā na sake

baḌhā na tishnagī itnī shadīd tauba kar

jo nazm-o-nasr kā hai farq us ko qaa.em rakh

adab kī kar na yuuñ miTTī palīd tauba kar

jahān-e-nau meñ ajā.ib-gharoñ kī zīnat haiñ

tamām ġhāzī tamāmī shahīd tauba kar

najāt ke liye mohlat bachī hai kam ab aur

na kar zamīr kī bai.a-o-ḳharīd tauba kar

kisi ke dukh se na kar sukh kashid tauba kar

ubhar na waqt ka ban kar yazid tauba kar

fasil-e-zat se bahar nikal ki ye duniya

tere bharam se hai mutlaq baid tauba kar

nigah-e-shauq ko jalwe se yun na rakh mahrum

hai shirk jurat-e-inkar-e-did tauba kar

ki nazm-e-mai-kada rindon ki tab la na sake

baDha na tishnagi itni shadid tauba kar

jo nazm-o-nasr ka hai farq us ko qaem rakh

adab ki kar na yun miTTi palid tauba kar

jahan-e-nau mein ajaib-gharon ki zinat hain

tamam ghazi tamami shahid tauba kar

najat ke liye mohlat bachi hai kam ab aur

na kar zamir ki baia-o-KHarid tauba kar