kisi ke ishq mein KHud kho hawas baiThe hain

kisī ke ishq meñ ḳhud kho havās baiThe haiñ

unheñ ḳhabar hī nahīñ ham udaas baiThe haiñ

koī jatā.e unheñ jā ke nāma-bar ban ke

vo ek ham haiñ jo ab mahv-e-yās baiThe haiñ

nigāh-e-lutf-o-karam de ga.ī hameñ ġhaflat

jo muddatoñ se tire dar ke paas baiThe haiñ

ḳhabar nahīñ hai tumhīñ ko ai kaash gar hote

ki dil meñ le ke mohabbat kī aas baiThe haiñ

shamīm-e-gul kī tamanna hameñ zarūr nahīñ

mashām-e-jāñ meñ liye un kī yaas baiThe haiñ

balā-kashān-e-ġham-e-intizār haiñ ai 'prem'

nigāheñ dar pe lagī haiñ udaas baiThe haiñ

kisi ke ishq mein KHud kho hawas baiThe hain

unhen KHabar hi nahin hum udas baiThe hain

koi jatae unhen ja ke nama-bar ban ke

wo ek hum hain jo ab mahw-e-yas baiThe hain

nigah-e-lutf-o-karam de gai hamein ghaflat

jo muddaton se tere dar ke pas baiThe hain

KHabar nahin hai tumhin ko ai kash gar hote

ki dil mein le ke mohabbat ki aas baiThe hain

shamim-e-gul ki tamanna hamein zarur nahin

masham-e-jaan mein liye un ki yas baiThe hain

bala-kashan-e-gham-e-intizar hain ai 'prem'

nigahen dar pe lagi hain udas baiThe hain