kisi ke ru-e-gham-zada pe jab kabhi nazar gai

kisī ke rū-e-ġham-zada pe jab kabhī nazar ga.ī

ye merā dil taḌap uThā yā merī aañkh bhar ga.ī

hamārī umr-e-rafta kyā malūl kyā shagufta kyā

bhalī thī yā burī thī jo guzar ga.ī guzar ga.ī

vafā ke ek moḌ par gayā thā koī chhoḌ kar

hayāt jaise bas usī maqām par Thahar ga.ī

kamāl ḳhadd-o-ḳhāl the siyah ḳhamīda baal the

vo tamkanat ai sāhib-e-jamāl ab kidhar ga.ī

jo rāh-rau haiñ kam-nazar safar bhī un kā kyā safar

vahī hai un kī had jahāñ tak un kī rahguzar ga.ī

balā kī saḳht jaan thī zamīñ pe āsmān thī

vahī ye qaum hai adū kī sarzanish se mar ga.ī

ujaḌ gayā thā gulsitāñ ba-dast-e-mausam-e-ḳhizāñ

so phir bahār aa ga.ī kalī kalī sañvar ga.ī

kisi ke ru-e-gham-zada pe jab kabhi nazar gai

ye mera dil taDap uTha ya meri aankh bhar gai

hamari umr-e-rafta kya malul kya shagufta kya

bhali thi ya buri thi jo guzar gai guzar gai

wafa ke ek moD par gaya tha koi chhoD kar

hayat jaise bas usi maqam par Thahar gai

kamal KHadd-o-KHal the siyah KHamida baal the

wo tamkanat ai sahib-e-jamal ab kidhar gai

jo rah-rau hain kam-nazar safar bhi un ka kya safar

wahi hai un ki had jahan tak un ki rahguzar gai

bala ki saKHt jaan thi zamin pe aasman thi

wahi ye qaum hai adu ki sarzanish se mar gai

ujaD gaya tha gulsitan ba-dast-e-mausam-e-KHizan

so phir bahaar aa gai kali kali sanwar gai