kisi ke samne izhaar-e-dard-e-jaan na karun

kisī ke sāmne iz.hār-e-dard-e-jāñ na karūñ

udhar udhar kī kahūñ zaḳhm-e-dil ayaañ na karūñ

lagā ke aag badan meñ vo mujh se chāhtā hai

ki saañs luuñ to fazā ko dhuāñ dhuāñ na karūñ

maiñ us ko paḌhtā huuñ injīl-e-ārzū kī tarah

samajh meñ aa.e to ma.anī har ik bayāñ na karūñ

ġhazab hai mujh se tavaqqo zamāna rakhtā hai

ki pā-shikastagī meñ ranj-e-raftagāñ na karūñ

ye hukm mujh ko milā qasr-e-ḳhusravī se ki maiñ

fuġhāñ sunūñ magar andāza-e-fuġhāñ na karūñ

maze se so.uuñ agar haath aa.e shām-e-firāq

maiñ ek lamha bhī is shab kā rā.egāñ na karūñ

uThā ke sar pe phirūñ bār-e-ārzū 'mohsin'

kamar ko ḳham maiñ kabhī sūrat-e-kamāñ na karūñ

kisi ke samne izhaar-e-dard-e-jaan na karun

udhar udhar ki kahun zaKHm-e-dil ayan na karun

laga ke aag badan mein wo mujh se chahta hai

ki sans lun to faza ko dhuan dhuan na karun

main us ko paDhta hun injil-e-arzu ki tarah

samajh mein aae to mani har ek bayan na karun

ghazab hai mujh se tawaqqo zamana rakhta hai

ki pa-shikastagi mein ranj-e-raftagan na karun

ye hukm mujh ko mila qasr-e-KHusrawi se ki main

fughan sunun magar andaza-e-fughan na karun

maze se soun agar hath aae sham-e-firaq

main ek lamha bhi is shab ka raegan na karun

uTha ke sar pe phirun bar-e-arzu 'mohsin'

kamar ko KHam main kabhi surat-e-kaman na karun