kisi ke shikwa-ha-e-jaur se waqif zaban kyun ho

kisī ke shikva-hā-e-jaur se vāqif zabāñ kyuuñ ho

ġham-e-dil aag to lag hī chukī lekin dhuāñ kyuuñ ho

mohabbat meñ visāl-o-hijr kī tam.īz kyā ma.anī

bisāt-e-ishq par bāzīcha-e-sūd-o-ziyāñ kyuuñ ho

jabīñ saa.il thī nādim hai magar ai sajda-e-āḳhir

mirī mahrūmiyoñ se be-ta.alluq āstāñ kyuuñ ho

ḳhudāvandā chaman meñ to nasheman hī nasheman haiñ

nazar meñ barq kī sirf ek shāḳh-e-āshiyāñ kyuuñ ho

rivāyāt-e-kuhan ko azm-e-nau ḳhātir meñ kyā laa.e

zamīr-e-kārvāñ pāband-e-mīr-e-kārvāñ kyuuñ ho

ye maanā ek aañsū hai magar ai sa.ī-e-zabt-e-ġham

sar-e-mizhgāñ ye ik aañsū bhī dil kā tarjumāñ kyuuñ ho

zamāna jab bhulā hī baiThā 'ejāz'-e-hazīñ tujh ko

koī ab mehrbāñ kyuuñ ho koī nā-mehrbāñ kyuuñ ho

kisi ke shikwa-ha-e-jaur se waqif zaban kyun ho

gham-e-dil aag to lag hi chuki lekin dhuan kyun ho

mohabbat mein visal-o-hijr ki tamiz kya mani

bisat-e-ishq par bazicha-e-sud-o-ziyan kyun ho

jabin sail thi nadim hai magar ai sajda-e-aKHir

meri mahrumiyon se be-talluq aastan kyun ho

KHudawanda chaman mein to nasheman hi nasheman hain

nazar mein barq ki sirf ek shaKH-e-ashiyan kyun ho

riwayat-e-kuhan ko azm-e-nau KHatir mein kya lae

zamir-e-karwan paband-e-mir-e-karwan kyun ho

ye mana ek aansu hai magar ai sai-e-zabt-e-gham

sar-e-mizhgan ye ek aansu bhi dil ka tarjuman kyun ho

zamana jab bhula hi baiTha 'ejaz'-e-hazin tujh ko

koi ab mehrban kyun ho koi na-mehrban kyun ho