kisi KHamosh chehre par wo itminan ka manzar

kisī ḳhāmosh chehre par vo itmīnān kā manzar

jigar ko kāTtā hai ab bhī qabristān kā manzar

azāb-e-shiddat-e-karb-e-judā.ī ko vo kyā jaane

ki dekhā hī na ho jis ne nikaltī jaan kā manzar

uThī kursī kaTā sabza gire patte uḌī chiḌiyāñ

tumhāre ba.ad kyā se kyā huā dālān kā manzar

kahāñ huuñ kaun huuñ ye pūchhtā phirtā huuñ logoñ se

ki mujh se kho gayā shāyad mirī pahchān kā manzar

darīda-naqsh zaḳhmī lafz larzīda qatāroñ meñ

lahū meñ kis ne rangā hai mire dīvān kā manzar

hamāre qatl par chashm-e-falak meñ ḳhuun utregā

fazāoñ meñ sajegā surḳh se tūfān kā manzar

nahā ke pyaar kī bārish meñ us ne dhuup jab pahnī

nazar meñ ghul gayā qaus-e-quzah ke thaan kā manzar

darūn-e-zehn jab zebā.ish-e-afkār hī na ho

gharoñ meñ kyā hai phir ārā.ish-e-sāmān kā manzar

vo jitne diip andar haiñ vo āñkhoñ meñ hī jalte haiñ

aur āñkheñ hī dikhātī haiñ dil-e-vīrān kā manzar

samajhtā huuñ tirī saarī kahānī maiñ ki kyā hogī

hai dikhne meñ agar aisā tire unvān kā manzar

bharī duniyā kā 'tāhir' chappa chappa chhān maarā hai

nahīñ paayā kahīñ bhī shahr-e-pākistān kā manzar

kisi KHamosh chehre par wo itminan ka manzar

jigar ko kaTta hai ab bhi qabristan ka manzar

azab-e-shiddat-e-karb-e-judai ko wo kya jaane

ki dekha hi na ho jis ne nikalti jaan ka manzar

uThi kursi kaTa sabza gire patte uDi chiDiyan

tumhaare baad kya se kya hua dalan ka manzar

kahan hun kaun hun ye puchhta phirta hun logon se

ki mujh se kho gaya shayad meri pahchan ka manzar

darida-naqsh zaKHmi lafz larzida qataron mein

lahu mein kis ne ranga hai mere diwan ka manzar

hamare qatl par chashm-e-falak mein KHun utrega

fazaon mein sajega surKH se tufan ka manzar

naha ke pyar ki barish mein us ne dhup jab pahni

nazar mein ghul gaya qaus-e-quzah ke than ka manzar

darun-e-zehn jab zebaish-e-afkar hi na ho

gharon mein kya hai phir aaraish-e-saman ka manzar

wo jitne dip andar hain wo aankhon mein hi jalte hain

aur aankhen hi dikhati hain dil-e-viran ka manzar

samajhta hun teri sari kahani main ki kya hogi

hai dikhne mein agar aisa tere unwan ka manzar

bhari duniya ka 'tahir' chappa chappa chhan mara hai

nahin paya kahin bhi shahr-e-pakistan ka manzar