kisi KHamoshi ka zahr jab ek mukalme ki tarah se chup tha

kisī ḳhamoshī kā zahr jab ik mukālme kī tarah se chup thā

ye vāqi.a hai ki shahr-e-qātil bujhe diye kī tarah se chup thā

sahar ke āsār jab numāyāñ hue to bīnā.ī chhin chukī thī

qubūliyat kā vo ek lamha mujassame kī tarah se chup thā

kisī ta.alluq ke TūTne kā azaab donoñ ke dil par utrā

maiñ aks ban ke Thahar gayā thā vo ā.īne kī tarah se chup thā

paḌāv Daale kisī ne aa ke hazār kosoñ kī dūriyoñ meñ

hamārā dil ki kisī parinda ke ghoñsle kī tarah se chup thā

kahīñ se us ko bhī merī chāhat kī kuchh dalīleñ milī thiiñ shāyad

vo ab ke aayā to guzrī shāmoñ ke ik samay kī tarah se chup thā

kisi KHamoshi ka zahr jab ek mukalme ki tarah se chup tha

ye waqia hai ki shahr-e-qatil bujhe diye ki tarah se chup tha

sahar ke aasar jab numayan hue to binai chhin chuki thi

qubuliyat ka wo ek lamha mujassame ki tarah se chup tha

kisi talluq ke TuTne ka azab donon ke dil par utra

main aks ban ke Thahar gaya tha wo aaine ki tarah se chup tha

paDaw Dale kisi ne aa ke hazar koson ki duriyon mein

hamara dil ki kisi parinda ke ghonsle ki tarah se chup tha

kahin se us ko bhi meri chahat ki kuchh dalilen mili thin shayad

wo ab ke aaya to guzri shamon ke ek samay ki tarah se chup tha