kisi KHanjar kisi talwar ka muhtaj nahin

kisī ḳhanjar kisī talvār kā muhtāj nahīñ

dil vo mansūr hai jo daar kā muhtāj nahīñ

masnad-o-tāj yā aqdār kā muhtāj nahīñ

'ishq hākim kisī darbār kā muhtāj nahīñ

dil ke ehsās ko kyoñ hājat-e-goyā.ī ho

'ishq-e-sādiq ho to iz.hār kā muhtāj nahīñ

kabhī sahrā kabhī jangal kabhī galiyoñ meñ phire

dil ghumakkaḌ hai jo ghar-bār kā muhtāj nahīñ

be-hunar phirte haiñ shohrat ke ta'āqub meñ yahāñ

par mirā fan kisī parchār kā muhtāj nahīñ

us se kahnā ki vo ab mujh se kinārā kar le

ye bhī kahnā maiñ tire pyaar kā muhtāj nahīñ

haath phailā.e bhī 'sāhil' ne to rab ke aage

maiñ vo mañgtā huuñ jo sansār kā muhtāj nahīñ

kisi KHanjar kisi talwar ka muhtaj nahin

dil wo mansur hai jo dar ka muhtaj nahin

masnad-o-taj ya aqdar ka muhtaj nahin

'ishq hakim kisi darbar ka muhtaj nahin

dil ke ehsas ko kyon hajat-e-goyai ho

'ishq-e-sadiq ho to izhaar ka muhtaj nahin

kabhi sahra kabhi jangal kabhi galiyon mein phire

dil ghumakkaD hai jo ghar-bar ka muhtaj nahin

be-hunar phirte hain shohrat ke ta'aqub mein yahan

par mera fan kisi parchaar ka muhtaj nahin

us se kahna ki wo ab mujh se kinara kar le

ye bhi kahna main tere pyar ka muhtaj nahin

hath phailae bhi 'sahil' ne to rab ke aage

main wo mangta hun jo sansar ka muhtaj nahin