kisi ki aankh mein kya ek pal guzar aaya

kisī kī aañkh meñ kyā ek pal guzār aaya

maiñ apnī ziist ke ranj-o-alam utaar aaya

vo jis ke naam pe ham manzileñ fidā karte

hameñ vo shaḳhs kahīñ raah meñ hī maar aaya

shab-e-firāq se kah Daale dard duniyā ke

kahāñ kā bojh thā aur maiñ kahāñ utaar aaya

ki merī tīra-shabī meñ koī charāġh jale

maiñ is ḳhayāl se rāteñ ka.ī guzār aaya

so ab to dhoka hī khānā mirā muqaddar hai

ye kis jagah pe mujhe le ke e.atibār aaya

majāl-e-tark-e-ta.alluq na ho sakī varna

ḳhayāl-e-tark-e-ta.alluq to bār-bār aaya

udaas kamre kī vahshat kī ḳhair ho yā-rab

ham aise dasht-navardoñ ko bhī qarār aaya

maiñ ek umr se apnī muḳhālifat meñ huuñ

maiñ kyā karūñgā agar us taraf se vaar aaya

ham ek sahn meñ pal kar baḌe hue haiñ 'fahīm'

shajar pe bor to kāñdhoñ pe mere baar aaya

kisi ki aankh mein kya ek pal guzar aaya

main apni zist ke ranj-o-alam utar aaya

wo jis ke nam pe hum manzilen fida karte

hamein wo shaKHs kahin rah mein hi mar aaya

shab-e-firaq se kah Dale dard duniya ke

kahan ka bojh tha aur main kahan utar aaya

ki meri tira-shabi mein koi charagh jale

main is KHayal se raaten kai guzar aaya

so ab to dhoka hi khana mera muqaddar hai

ye kis jagah pe mujhe le ke eatibar aaya

majal-e-tark-e-talluq na ho saki warna

KHayal-e-tark-e-talluq to bar-bar aaya

udas kamre ki wahshat ki KHair ho ya-rab

hum aise dasht-nawardon ko bhi qarar aaya

main ek umr se apni muKHalifat mein hun

main kya karunga agar us taraf se war aaya

hum ek sahn mein pal kar baDe hue hain 'fahim'

shajar pe bor to kandhon pe mere bar aaya