kisi ki anjuman-e-naz mein hua ruswa

kisī kī anjuman-e-nāz meñ huā rusvā

maiñ ik rind-e-tarab-gāh-e-ārzū Thahrā

vo muskurā diyā sāġhar chhalak uThā dil kā

nasha chaḌhā to kuchh aisā ki phir utar na sakā

kabhī talātum-e-dariyā kabhī hai hasrat-e-dil

hamāre husn-e-talab ko duā se nisbat kyā

ḳhizāñ ke sar koī ilzām kis liye aa.e

gale pe ban gayā ḳhanjar bahār kā saudā

charāġh-e-rāhguzar shān-e-be-niyāzī se

tamām raat havāoñ kī zad meñ raushan thā

kahāñ ke dār-o-rasan kushta-e-vafā ke liye

use to kūcha-e-jānāñ kī lag chukī hai havā

jabīn-e-shauq to rakh dī hai āstāñ pe tire

havā-e-dil na uḌā le chale sū-e-sahrā

vo jis ke husn kā shohra tamām shahr meñ hai

sunā hai 'anjum'-e-vahshī pe mehrbān huā

kisi ki anjuman-e-naz mein hua ruswa

main ek rind-e-tarab-gah-e-arzu Thahra

wo muskura diya saghar chhalak uTha dil ka

nasha chaDha to kuchh aisa ki phir utar na saka

kabhi talatum-e-dariya kabhi hai hasrat-e-dil

hamare husn-e-talab ko dua se nisbat kya

KHizan ke sar koi ilzam kis liye aae

gale pe ban gaya KHanjar bahaar ka sauda

charagh-e-rahguzar shan-e-be-niyazi se

tamam raat hawaon ki zad mein raushan tha

kahan ke dar-o-rasan kushta-e-wafa ke liye

use to kucha-e-jaanan ki lag chuki hai hawa

jabin-e-shauq to rakh di hai aastan pe tere

hawa-e-dil na uDa le chale su-e-sahra

wo jis ke husn ka shohra tamam shahr mein hai

suna hai 'anjum'-e-wahshi pe mehrban hua