kisi ki be-ruKHi hai aur main hun

kisī kī be-ruḳhī hai aur maiñ huuñ

ma.āl-e-āshiqī hai aur maiñ huuñ

falak ne phir na.e fitne jagā.e

kamāl-e-dushmanī hai aur maiñ huuñ

jigar ke daaġh haiñ sham-e-farozāñ

har ik sū raushnī hai aur maiñ huuñ

ḳhushī kā baab mujh ko DhūñDhtā hai

kitāb-e-zindagī hai aur maiñ huuñ

matā-e-dil luTā.e jā rahā huuñ

mirī dariyā-dilī hai aur maiñ huuñ

thā kal tak raunaq-e-bazm-e-hasīnāñ

magar ab bebasī hai aur maiñ huuñ

saje 'āzād' kaise bazm-e-hastī

yahī gar zindagī hai aur maiñ huuñ

kisi ki be-ruKHi hai aur main hun

maal-e-ashiqi hai aur main hun

falak ne phir nae fitne jagae

kamal-e-dushmani hai aur main hun

jigar ke dagh hain sham-e-farozan

har ek su raushni hai aur main hun

KHushi ka bab mujh ko DhunDhta hai

kitab-e-zindagi hai aur main hun

mata-e-dil luTae ja raha hun

meri dariya-dili hai aur main hun

tha kal tak raunaq-e-bazm-e-hasinan

magar ab bebasi hai aur main hun

saje 'azad' kaise bazm-e-hasti

yahi gar zindagi hai aur main hun