kisi ki chashm-e-maigun ka fusun hai

kisī kī chashm-e-maigūñ kā fusūñ hai

tabī'at meñ 'ajab rang-e-junūñ hai

mohabbat ke sivā kyā is ko kahiye

jo us kī yaad kā 'ālam fuzūñ hai

mohabbat kī navāzish allāh allāh

'ajab ik lazzat-e-soz-e-darūñ hai

karam meñ bhī na hoñ maḳhfī jafā.eñ

ki andāz-e-sitam jo gūnā-gūñ hai

ġham-o-andoh kā 'ālam na pūchho

ki hālat qalb-e-muztar kī zubūñ hai

ma.āl-e-‘ishq aisā tauba tauba

ziyāñ hai jaan kā aur dil kā ḳhuuñ hai

bapā shorish hai kyoñ 'in'ām' harsū

dil-o-jāñ tishna-e-zauq-e-sukūñ hai

kisi ki chashm-e-maigun ka fusun hai

tabi'at mein 'ajab rang-e-junun hai

mohabbat ke siwa kya is ko kahiye

jo us ki yaad ka 'alam fuzun hai

mohabbat ki nawazish allah allah

'ajab ek lazzat-e-soz-e-darun hai

karam mein bhi na hon maKHfi jafaen

ki andaz-e-sitam jo guna-gun hai

gham-o-andoh ka 'alam na puchho

ki haalat qalb-e-muztar ki zubun hai

maal-e-‘ishq aisa tauba tauba

ziyan hai jaan ka aur dil ka KHun hai

bapa shorish hai kyon 'in'am' harsu

dil-o-jaan tishna-e-zauq-e-sukun hai