kisi ki dastan-dar-dastan se kuchh nahin hota

kisī kī dāstāñ-dar-dāstāñ se kuchh nahīñ hotā

asar jab tak na ho husn-e-bayāñ se kuchh nahīñ hotā

yaqīñ kī manziloñ meñ īn-o-āñ se kuchh nahīñ hotā

gumāñ kitnā hī baḌh jaa.e gumāñ se kuchh nahīñ hotā

talab sādiq nahīñ to nā-rasā.ī kī shikāyat kyā

na jab tak dil kī shirkat ho zabāñ se kuchh nahīñ hotā

pighal jaatā hai patthar bhī pighal jaatā hai aahan bhī

ye kis ne kah diyā soz-e-nihāñ se kuchh nahīñ hotā

hijāb-e-darmiyāñ se diid kā armān baḌhtā hai

adā matlab hijāb-e-darmiyāñ se kuchh nahīñ hotā

jise marnā nahīñ aatā use jiinā nahīñ aatā

dil-e-be-his hayāt-e-jāvidāñ se kuchh nahīñ hotā

raqam farmā.iye ḳhūn-e-jigar se dāstāñ apnī

kabhī arz-e-hadīs-e-dīgarāñ se kuchh nahīñ hotā

badalte jā rahe haiñ dam-ba-dam ā.īn-e-mai-ḳhāna

mayān-e-mai-kadā pīr-e-muġhāñ se kuchh nahīñ hotā

rihā.ī ke liye bhī fikr kuchh ai bulbul-e-nādāñ

qafas meñ sirf yād-e-āshiyāñ se kuchh nahīñ hotā

jo Thokar mārtā hai ye usī ke paañv paḌtī hai

ye duniyā hai yahāñ āh-o-fuġhāñ se kuchh nahīñ hotā

ibādat ke liye iḳhlās kī be-had zarūrat hai

na ho rūh-e-bilālī to azaañ se kuchh nahīñ hotā

jo hotā hai mashiyyat ke ishāre se vo hotā hai

kisī nā-mehrbāñ yā mehrbāñ se kuchh nahīñ hotā

bahar-unvān ho kar hī rahegā vo jo honā hai

tire andesha-e-sūd-o-ziyāñ se kuchh nahīñ hotā

nahīñ chaltī kisī ke sāmne 'tālib' nahīñ chaltī

nazar se kuchh nahīñ hotā zabāñ se kuchh nahīñ hotā

kisi ki dastan-dar-dastan se kuchh nahin hota

asar jab tak na ho husn-e-bayan se kuchh nahin hota

yaqin ki manzilon mein in-o-an se kuchh nahin hota

guman kitna hi baDh jae guman se kuchh nahin hota

talab sadiq nahin to na-rasai ki shikayat kya

na jab tak dil ki shirkat ho zaban se kuchh nahin hota

pighal jata hai patthar bhi pighal jata hai aahan bhi

ye kis ne kah diya soz-e-nihan se kuchh nahin hota

hijab-e-darmiyan se did ka arman baDhta hai

ada matlab hijab-e-darmiyan se kuchh nahin hota

jise marna nahin aata use jina nahin aata

dil-e-be-his hayat-e-jawidan se kuchh nahin hota

raqam farmaiye KHun-e-jigar se dastan apni

kabhi arz-e-hadis-e-digaran se kuchh nahin hota

badalte ja rahe hain dam-ba-dam aain-e-mai-KHana

mayan-e-mai-kada pir-e-mughan se kuchh nahin hota

rihai ke liye bhi fikr kuchh ai bulbul-e-nadan

qafas mein sirf yaad-e-ashiyan se kuchh nahin hota

jo Thokar marta hai ye usi ke panw paDti hai

ye duniya hai yahan aah-o-fughan se kuchh nahin hota

ibaadat ke liye iKHlas ki be-had zarurat hai

na ho ruh-e-bilali to azan se kuchh nahin hota

jo hota hai mashiyyat ke ishaare se wo hota hai

kisi na-mehrban ya mehrban se kuchh nahin hota

bahar-unwan ho kar hi rahega wo jo hona hai

tere andesha-e-sud-o-ziyan se kuchh nahin hota

nahin chalti kisi ke samne 'talib' nahin chalti

nazar se kuchh nahin hota zaban se kuchh nahin hota