کسی کی داستاں در داستاں سے کچھ نہیں ہوتا

کسی کی داستاں در داستاں سے کچھ نہیں ہوتا

اثر جب تک نہ ہو حسن بیاں سے کچھ نہیں ہوتا

یقیں کی منزلوں میں این و آں سے کچھ نہیں ہوتا

گماں کتنا ہی بڑھ جائے گماں سے کچھ نہیں ہوتا

طلب صادق نہیں تو نارسائی کی شکایت کیا

نہ جب تک دل کی شرکت ہو زباں سے کچھ نہیں ہوتا

پگھل جاتا ہے پتھر بھی پگھل جاتا ہے آہن بھی

یہ کس نے کہہ دیا سوز نہاں سے کچھ نہیں ہوتا

حجاب درمیاں سے دید کا ارمان بڑھتا ہے

ادا مطلب حجاب درمیاں سے کچھ نہیں ہوتا

جسے مرنا نہیں آتا اسے جینا نہیں آتا

دل بے حس حیات جاوداں سے کچھ نہیں ہوتا

رقم فرمائیے خون جگر سے داستاں اپنی

کبھی عرض حدیث دیگراں سے کچھ نہیں ہوتا

بدلتے جا رہے ہیں دم بہ دم آئین مے خانہ

میان میکدہ پیر مغاں سے کچھ نہیں ہوتا

رہائی کے لئے بھی فکر کچھ اے بلبل ناداں

قفس میں صرف یاد آشیاں سے کچھ نہیں ہوتا

جو ٹھوکر مارتا ہے یہ اسی کے پاؤں پڑتی ہے

یہ دنیا ہے یہاں آہ و فغاں سے کچھ نہیں ہوتا

عبادت کے لئے اخلاص کی بے حد ضرورت ہے

نہ ہو روح بلالی تو اذاں سے کچھ نہیں ہوتا

جو ہوتا ہے مشیت کے اشارے سے وہ ہوتا ہے

کسی نا مہرباں یا مہرباں سے کچھ نہیں ہوتا

بہر عنوان ہو کر ہی رہے گا وہ جو ہونا ہے

ترے اندیشۂ سود و زیاں سے کچھ نہیں ہوتا

نہیں چلتی کسی کے سامنے طالبؔ نہیں چلتی

نظر سے کچھ نہیں ہوتا زباں سے کچھ نہیں ہوتا