kisi ki mehndi ka rang hathon se dho bhi sakta hai aur nahin bhi

kisī kī mehñdī kā rang hāthoñ se dho bhī saktā hai aur nahīñ bhī

vo dil se chāhe jo merā honā to ho bhī saktā hai aur nahīñ bhī

jo shaam Dhalte hī merī āñkhoñ meñ jhilmilātā hai chāñd ban kar

vo apne siine meñ merī dhaḌkan samo bhī saktā hai aur nahīñ bhī

jo apne zaḳhmoñ ko merī nazroñ se duur rakhne kā sochtā hai

vo merī palkoñ kī narm chhāñv meñ so bhī saktā hai aur nahīñ bhī

agarche tūfān-e-ashk ham ko tumhāre ġham ne atā kiyā hai

magar ye tūfān apnī kashtī Dubo bhī saktā hai aur nahīñ bhī

maiñ sar se pā tak huuñ us kā lekin duā.eñ merī vafā.eñ merī

ik apne harjā.ī-pan ke baa.is vo kho bhī saktā hai aur nahīñ bhī

mujhe yaqīñ hai bichhaḌ ke mujh se hazār aaheñ bharegā lekin

vo chand ashkoñ se apnā dāman bhigo bhī saktā hai aur nahīñ bhī

tumhārā 'shahbāz' jis ko jānāñ mohabbateñ raas hī na aa.iiñ

vo chand din tak tumhārī duniyā meñ ho bhī saktā hai aur nahīñ bhī

kisi ki mehndi ka rang hathon se dho bhi sakta hai aur nahin bhi

wo dil se chahe jo mera hona to ho bhi sakta hai aur nahin bhi

jo sham Dhalte hi meri aankhon mein jhilmilata hai chand ban kar

wo apne sine mein meri dhaDkan samo bhi sakta hai aur nahin bhi

jo apne zaKHmon ko meri nazron se dur rakhne ka sochta hai

wo meri palkon ki narm chhanw mein so bhi sakta hai aur nahin bhi

agarche tufan-e-ashk hum ko tumhaare gham ne ata kiya hai

magar ye tufan apni kashti Dubo bhi sakta hai aur nahin bhi

main sar se pa tak hun us ka lekin duaen meri wafaen meri

ek apne harjai-pan ke bais wo kho bhi sakta hai aur nahin bhi

mujhe yaqin hai bichhaD ke mujh se hazar aahen bharega lekin

wo chand ashkon se apna daman bhigo bhi sakta hai aur nahin bhi

tumhaara 'shahbaz' jis ko jaanan mohabbaten ras hi na aain

wo chand din tak tumhaari duniya mein ho bhi sakta hai aur nahin bhi