kisi ki tham kar ungli idhar jate udhar jate

kisī kī thaam kar unglī idhar jaate udhar jaate

hamāre paas ghar hotā to ham bhī apne ghar jaate

agar tum haath rakh dete mirī āñkhoñ kī larzish par

mirī be-rang duniyā meñ balā ke rang bhar jaate

ḳhudā rakkhe udāsī ne hameñ baḳhshī hai yakjā.ī

ḳhushī kā shor sun lete to pal bhar meñ bikhar jaate

hamāre saath aatī thī galī ke tīsre ghar tak

udāsī ghar meñ aa jaatī to jaane ham kidhar jaate

kabhī duniyā kabhī dariyā kabhī sāñsoñ ne koshish kī

mohabbat haath rakh detī to ham hairat se mar jaate

na ham lahroñ ke parvarda na ham kashtī ke shaidā.ī

jahāñ naddī utar jaatī vahīñ ham bhī utar jaate

kisi ki tham kar ungli idhar jate udhar jate

hamare pas ghar hota to hum bhi apne ghar jate

agar tum hath rakh dete meri aankhon ki larzish par

meri be-rang duniya mein bala ke rang bhar jate

KHuda rakkhe udasi ne hamein baKHshi hai yakjai

KHushi ka shor sun lete to pal bhar mein bikhar jate

hamare sath aati thi gali ke tisre ghar tak

udasi ghar mein aa jati to jaane hum kidhar jate

kabhi duniya kabhi dariya kabhi sanson ne koshish ki

mohabbat hath rakh deti to hum hairat se mar jate

na hum lahron ke parwarda na hum kashti ke shaidai

jahan naddi utar jati wahin hum bhi utar jate