kisi ki yaad ka saya tha ya ki jhonka tha

kisī kī yaad kā saayā thā yā ki jhoñkā thā

mire qarīb se ho kar koī to guzrā thā

ajab tilism thā us shahr meñ bhī ai logo

palak jhapakte hī apnā jo thā parāyā thā

mujhe ḳhabar ho jo apnī to tum ko likh bhejūñ

abhī to DhūñD rahā huuñ vo ghar jo merā thā

kisī ne muḌ ke na dekhā kisī ne daad na dī

lahūluhān laboñ par mire bhī naġhma thā

maiñ bach ke jaatā to kis samt kis jagah ki mujhe

kahīñ zamīñ ne kahīñ āsmāñ ne gherā thā

zarā pukār ke dekhūñ na un dayāroñ meñ

mirā ḳhayāl hai ik shaḳhs merā apnā thā

mahak lahū kī thī yā tere pairahan kī thī

mire badan se hayūlā sā ek lipTā thā

udaas ghaḌiyo zarā ye pata to de jaao

kahāñ gayā vo ḳhushī kā jo ek lamha thā

kisi ki yaad ka saya tha ya ki jhonka tha

mere qarib se ho kar koi to guzra tha

ajab tilism tha us shahr mein bhi ai logo

palak jhapakte hi apna jo tha paraya tha

mujhe KHabar ho jo apni to tum ko likh bhejun

abhi to DhunD raha hun wo ghar jo mera tha

kisi ne muD ke na dekha kisi ne dad na di

lahuluhan labon par mere bhi naghma tha

main bach ke jata to kis samt kis jagah ki mujhe

kahin zamin ne kahin aasman ne ghera tha

zara pukar ke dekhun na un dayaron mein

mera KHayal hai ek shaKHs mera apna tha

mahak lahu ki thi ya tere pairahan ki thi

mere badan se hayula sa ek lipTa tha

udas ghaDiyo zara ye pata to de jao

kahan gaya wo KHushi ka jo ek lamha tha