kisi ki yaad phir KHalwat-nashin malum hoti hai

kisī kī yaad phir ḳhalvat-nashīñ ma.alūm hotī hai

tabī.at āj-kal andoh-gīñ ma.alūm hotī hai

mohabbat kā har ik sajda bhī me.arāj-e-mohabbat hai

maqām-e-arsh ab merī jabīñ ma.alūm hotī hai

kabhī shabnam kabhī taare kabhī tum muskurāte ho

mohabbat kī har ik saa.at hasīñ ma.alūm hotī hai

zarā tum haath rakkho yā ḳhalish dard-e-mohabbat kī

yahīñ ma.alūm hotī hai yahīñ ma.alūm hotī hai

agar tum muskurāo bhī to dil par choT lagtī hai

tumhārī har adā dard-āfrīñ ma.alūm hotī hai

idhar rū-posh haiñ taare udhar ghar meñ udāsī hai

shab-e-ġham kyā qayāmat-āfrīñ ma.alūm hotī hai

har ik zarre meñ rañgīnī hai ki ḳhūnī mohabbat kī

tumhāre hī ye kūche kī zamīñ ma.alūm hotī hai

jahāñ rakhtā huuñ sar apnā simaT aatī hai kul duniyā

mujhe taqdīs-e-sajda ab kahīñ ma.alūm hotī hai

mohabbat kī maiñ kis manzil meñ huuñ allāhu-akbar ab

musībat bhī masarrat-āfrīñ ma.alūm hotī hai

zarā Thahro mujhe kahne bhī do rūdād-e-ġham apnī

ajab-ḳhoshī tumhārī nukta-chīñ ma.alūm hotī hai

maiñ sahrā meñ bhī jannat ke maze letā huuñ ai 'fā.iq'

tabī.at ḳhud mirī husn-āfrīñ ma.alūm hotī hai

kisi ki yaad phir KHalwat-nashin malum hoti hai

tabiat aaj-kal andoh-gin malum hoti hai

mohabbat ka har ek sajda bhi mearaj-e-mohabbat hai

maqam-e-arsh ab meri jabin malum hoti hai

kabhi shabnam kabhi tare kabhi tum muskuraate ho

mohabbat ki har ek saat hasin malum hoti hai

zara tum hath rakkho ya KHalish dard-e-mohabbat ki

yahin malum hoti hai yahin malum hoti hai

agar tum muskurao bhi to dil par choT lagti hai

tumhaari har ada dard-afrin malum hoti hai

idhar ru-posh hain tare udhar ghar mein udasi hai

shab-e-gham kya qayamat-afrin malum hoti hai

har ek zarre mein rangini hai ki KHuni mohabbat ki

tumhaare hi ye kuche ki zamin malum hoti hai

jahan rakhta hun sar apna simaT aati hai kul duniya

mujhe taqdis-e-sajda ab kahin malum hoti hai

mohabbat ki main kis manzil mein hun allahu-akbar ab

musibat bhi masarrat-afrin malum hoti hai

zara Thahro mujhe kahne bhi do rudad-e-gham apni

ajab-KHoshi tumhaari nukta-chin malum hoti hai

main sahra mein bhi jannat ke maze leta hun ai 'faiq'

tabiat KHud meri husn-afrin malum hoti hai