kisi ki zist ka bas ek bab sannaTa

kisī kī ziist kā bas ek baab sannāTā

kisī ke vāste puurā nisāb sannāTā

hai us ko lafz se matlab mujhe ma.ānī se

hai us kā shor mirā intiḳhāb sannāTā

darūn-e-ḳhāna kī vīrāniyāñ kuchh aisī thiiñ

barūn-e-ḳhāna huā aab aab sannāTā

mujhe pata hai kahānī kā iḳhtitām hai kyā

tavīl baat kā lubb-e-lubāb sannāTā

mirī ḳhamoshī pe uñglī uThātā rahtā hai

ḳhud apnā kartā nahīñ ehtisāb sannāTā

buland hotī sadā ko dabā ke ḳhush mat ho

zarūr lā.egā ik inqalāb sannāTā

shab-e-firāq tirī yaad merī tanhā.ī

udaas udaas fazā māhtāb sannāTā

abhī 'kamāl' yahāñ qahqahe uchhalte haiñ

kahīñ na kar de unheñ ek ḳhvāb sannāTā

kisi ki zist ka bas ek bab sannaTa

kisi ke waste pura nisab sannaTa

hai us ko lafz se matlab mujhe maani se

hai us ka shor mera intiKHab sannaTa

darun-e-KHana ki viraniyan kuchh aisi thin

barun-e-KHana hua aab aab sannaTa

mujhe pata hai kahani ka iKHtitam hai kya

tawil baat ka lubb-e-lubab sannaTa

meri KHamoshi pe ungli uThata rahta hai

KHud apna karta nahin ehtisab sannaTa

buland hoti sada ko daba ke KHush mat ho

zarur laega ek inqalab sannaTa

shab-e-firaq teri yaad meri tanhai

udas udas faza mahtab sannaTa

abhi 'kamal' yahan qahqahe uchhalte hain

kahin na kar de unhen ek KHwab sannaTa