kisi kisi ko samajh aati hai kahani bhi

kisī kisī ko samajh aatī hai kahānī bhī

har ek shaḳhs pe khulte nahīñ ma'ānī bhī

ye log pūchh rahe haiñ tumhāre baare meñ

maiñ sochtā huuñ suhūlat hai be-zabānī bhī

ḳhalā kā ranj bhī hai ḳhaak se mohabbat bhī

zamīn-zād bhī huuñ aur āsmānī bhī

ab is tarah to bichhaḌne se kuchh nahīñ hogā

koī to raah nikālo na darmiyānī bhī

bas ek dasht hī dīvār tak nahīñ aayā

hamārī samt safar kar rahā hai paanī bhī

maiñ jāntā huuñ tirā 'ishq bhī ai jān-e-'hayāt'

zarūr chhoḌ ke jā.egā ik nishānī bhī

kisi kisi ko samajh aati hai kahani bhi

har ek shaKHs pe khulte nahin ma'ani bhi

ye log puchh rahe hain tumhaare bare mein

main sochta hun suhulat hai be-zabani bhi

KHala ka ranj bhi hai KHak se mohabbat bhi

zamin-zad bhi hun aur aasmani bhi

ab is tarah to bichhaDne se kuchh nahin hoga

koi to rah nikalo na darmiyani bhi

bas ek dasht hi diwar tak nahin aaya

hamari samt safar kar raha hai pani bhi

main jaanta hun tera 'ishq bhi ai jaan-e-'hayat'

zarur chhoD ke jaega ek nishani bhi