kisi ko kya KHabar ai subh waqt-e-sham kya hoga

kisī ko kyā ḳhabar ai sub.h vaqt-e-shām kyā hogā

ḳhudā jaane tire āġhāz kā anjām kyā hogā

giraftārān-e-gesū par nahīñ kuchh munhasir nāseh

phañsā hai jo ta.alluq meñ use ārām kyā hogā

abas hai zāhidoñ ko mai-kashī meñ uzr-e-nādārī

gurū rakh leñ usī ko jāma-e-ehrām kyā hogā

vahī rah rah ke ghabrānā vahī nā-kār-gar aaheñ

sivā is baat ke tujh se dil-e-nākām kyā hogā

use bhī jald uThā kar tāq-e-nisyāñ ke havāle kar

nahīñ pesh-e-nazar jab ḳhatm to saaqī jaam kyā hogā

yahī TuuTe subū miTTī ke kaafī haiñ qanā.at kar

bilorīñ jām-e-mai ai riñd dard-āshām kyā hogā

taqarrub jin ko hai un ko bhī yak-gūna hai māyūsī

ye hālat hai to phir dīdār terā aam kyā hogā

na pūchho muftiyān-e-shar.a kā ahvāl jaane do

tanaffur kufr ko jis se ho vo islām kyā hogā

sahar furqat kī hai aur ġhash pe ġhash aate haiñ āshiq ko

abhī se jab ye hālat ho ga.ī tā-shām kyā hogā

za.īfī meñ tū 'shād' allāhu-akbar pī gayā ḳhum tak

javānī meñ kaho ye riñd mai-āshām kyā hogā

zamāna 'shād' begārī meñ kyuuñ āḳhir phañsātā hai

apāhij kar diyā piirī ne mujh se kaam kyā hogā

kisi ko kya KHabar ai subh waqt-e-sham kya hoga

KHuda jaane tere aaghaz ka anjam kya hoga

giraftaran-e-gesu par nahin kuchh munhasir naseh

phansa hai jo talluq mein use aaram kya hoga

abas hai zahidon ko mai-kashi mein uzr-e-nadari

guru rakh len usi ko jama-e-ehram kya hoga

wahi rah rah ke ghabrana wahi na-kar-gar aahen

siwa is baat ke tujh se dil-e-nakaam kya hoga

use bhi jald uTha kar taq-e-nisyan ke hawale kar

nahin pesh-e-nazar jab KHatm to saqi jam kya hoga

yahi TuTe subu miTTi ke kafi hain qanaat kar

bilorin jam-e-mai ai rind dard-asham kya hoga

taqarrub jin ko hai un ko bhi yak-guna hai mayusi

ye haalat hai to phir didar tera aam kya hoga

na puchho muftiyan-e-shara ka ahwal jaane do

tanaffur kufr ko jis se ho wo islam kya hoga

sahar furqat ki hai aur ghash pe ghash aate hain aashiq ko

abhi se jab ye haalat ho gai ta-sham kya hoga

zaifi mein tu 'shad' allahu-akbar pi gaya KHum tak

jawani mein kaho ye rind mai-asham kya hoga

zamana 'shad' begari mein kyun aaKHir phansata hai

apahij kar diya piri ne mujh se kaam kya hoga