kisi ko lakh zamana kahe wo achchhe the

kisī ko laakh zamāna kahe vo achchhe the

jo log aap ko achchhe lage vo achchhe the

jo paude maiñ ne lagā.e the us meñ phuul khile

jo phuul tohfe meñ mujh ko mile vo achchhe the

thā nok-e-teġh-e-vafā kā safar magar jo log

idhar udhar se guzarte rahe vo achchhe the

vo ba.ad-e-vasl vafā kī umiid karne lagā

zakāt de ke jo chalte bane vo achchhe the

jo shaḳhs sab se burā thā yahāñ par us kī bhī

kuchh ek ġhazleñ thiiñ kuchh sher the vo achchhe the

ḳhamosh rah ke marāsim bachā.e to ye khulā

jhagaḌte the jo binā baat ke vo achchhe the

kahānī-kār ne maqtā badal diyā varna

ġhazal meñ vasl ke jo sher the vo achchhe the

kisi ko lakh zamana kahe wo achchhe the

jo log aap ko achchhe lage wo achchhe the

jo paude main ne lagae the us mein phul khile

jo phul tohfe mein mujh ko mile wo achchhe the

tha nok-e-tegh-e-wafa ka safar magar jo log

idhar udhar se guzarte rahe wo achchhe the

wo baad-e-wasl wafa ki umid karne laga

zakat de ke jo chalte bane wo achchhe the

jo shaKHs sab se bura tha yahan par us ki bhi

kuchh ek ghazlen thin kuchh sher the wo achchhe the

KHamosh rah ke marasim bachae to ye khula

jhagaDte the jo bina baat ke wo achchhe the

kahani-kar ne maqta badal diya warna

ghazal mein wasl ke jo sher the wo achchhe the