kisi mahaz pe wo bolne nahin deta

kisī mahāz pe vo bolne nahīñ detā

zarūratan bhī zabāñ kholne nahīñ detā

qafas meñ ab bhī muhāfiz ka.ī parindoñ par

nigāh rakhtā hai par tolne nahīñ detā

vo jis kā haq hai use bhī to nā-shanās-e-vafā

mahal-sarāoñ ke dar kholne nahīñ detā

mirā bhī pyaar hai sādiq isī liye to kabhī

kisī ko pyaar meñ sam gholne nahīñ detā

vo chāhtā hai ki sahrā-navard ban jā.ūñ

makān-e-zehn ke dar kholne nahīñ detā

hazār-hā guhar-e-ashk-e-gul ba-vaqt-e-sahar

chaman meñ mausam-e-gul rolne nahīñ detā

vo tark-e-'ishq kī detā hai dhamkiyāñ mujh ko

jo baat sach hai use bolne nahīñ detā

havā ne pairahan-e-bādbāñ uḌā bhī diyā

ye nā-ḳhudā hai ki lab kholne nahīñ detā

taḳhayyulāt pe 'hairat' ke chhā gayā aisā

tasavvurāt ke dar kholne nahīñ detā

kisi mahaz pe wo bolne nahin deta

zaruratan bhi zaban kholne nahin deta

qafas mein ab bhi muhafiz kai parindon par

nigah rakhta hai par tolne nahin deta

wo jis ka haq hai use bhi to na-shanas-e-wafa

mahal-saraon ke dar kholne nahin deta

mera bhi pyar hai sadiq isi liye to kabhi

kisi ko pyar mein sam gholne nahin deta

wo chahta hai ki sahra-naward ban jaun

makan-e-zehn ke dar kholne nahin deta

hazar-ha guhar-e-ashk-e-gul ba-waqt-e-sahar

chaman mein mausam-e-gul rolne nahin deta

wo tark-e-'ishq ki deta hai dhamkiyan mujh ko

jo baat sach hai use bolne nahin deta

hawa ne pairahan-e-baadban uDa bhi diya

ye na-KHuda hai ki lab kholne nahin deta

taKHayyulat pe 'hairat' ke chha gaya aisa

tasawwuraat ke dar kholne nahin deta