kisi mein tab na thi tohmaten uThane ki

kisī meñ taab na thī tohmateñ uThāne kī

jale charāġh to palkeñ jhukīñ zamāne kī

jise bhī dekhiye apnī anā kā maarā hai

umiid kis se rakhe koī daad paane kī

tirī galī meñ bhī dār-o-rasan kā charchā hai

badal ga.ī hai havā kis qadar zamāne kī

charāġh-e-kushta kī mānind nauha-ḳhvāñ ye log

bane haiñ surḳhī-e-āġhāz kis fasāne kī

larazte hāthoñ meñ sāz-e-shikasta kis ne liyā

ki jaise Duub ga.ī nabz ik zamāne kī

fasāna sharh-talab is qadar na thā lekin

kahāñ kahāñ na uḌī ḳhaak āshiyāne kī

kuchh aur ho ga.e 'shāhīn' zaḳhm-e-dil taaza

vo merī sa.ī-e-pareshāñ unheñ bhulāne kī

kisi mein tab na thi tohmaten uThane ki

jale charagh to palken jhukin zamane ki

jise bhi dekhiye apni ana ka mara hai

umid kis se rakhe koi dad pane ki

teri gali mein bhi dar-o-rasan ka charcha hai

badal gai hai hawa kis qadar zamane ki

charagh-e-kushta ki manind nauha-KHwan ye log

bane hain surKHi-e-aghaz kis fasane ki

larazte hathon mein saz-e-shikasta kis ne liya

ki jaise Dub gai nabz ek zamane ki

fasana sharh-talab is qadar na tha lekin

kahan kahan na uDi KHak aashiyane ki

kuchh aur ho gae 'shahin' zaKHm-e-dil taza

wo meri sai-e-pareshan unhen bhulane ki