kisi ne abhi mujhko mana nahin

kisī ne abhī mujh ko maanā nahīñ

mirā saath detā zamāna nahīñ

kisī roz chamkeñge jauhar mire

abhī mujh ko duniyā ne jaanā nahīñ

mirī shā.erī hai taqāzā-e-zauq

mujhe zor-e-fan āzmānā nahīñ

mujhe ḳhalq ke dil meñ karnā hai ghar

faqat rang apnā jamānā nahīñ

jo kahtā huuñ maiñ dil kī hai vārdāt

ye kuchh shā.erī yā fasānā nahīñ

zamāna huā mujh ko jiite hue

sabab maiñ ne jiine kā jaanā nahīñ

sujhāyā to maiñ ne bahut nek-o-bad

ye dil merā kambaḳht maanā nahīñ

mire dil ne khaa.ī haiñ choTeñ bahut

tum ab aur is ko dukhānā nahīñ

nahīñ hai vo dil hai koī aur shai

agar tīr-e-ġham kā nishānā nahīñ

maiñ hañstā rahā zindagī-bhar 'jalīl'

kisī ne mirā dard jaanā nahīñ

kisi ne abhi mujh ko mana nahin

mera sath deta zamana nahin

kisi roz chamkenge jauhar mere

abhi mujh ko duniya ne jaana nahin

meri shaeri hai taqaza-e-zauq

mujhe zor-e-fan aazmana nahin

mujhe KHalq ke dil mein karna hai ghar

faqat rang apna jamana nahin

jo kahta hun main dil ki hai wardat

ye kuchh shaeri ya fasana nahin

zamana hua mujh ko jite hue

sabab main ne jine ka jaana nahin

sujhaya to main ne bahut nek-o-bad

ye dil mera kambaKHt mana nahin

mere dil ne khai hain choTen bahut

tum ab aur is ko dukhana nahin

nahin hai wo dil hai koi aur shai

agar tir-e-gham ka nishana nahin

main hansta raha zindagi-bhar 'jalil'

kisi ne mera dard jaana nahin