kisi ne dekha nahin iltija ke lahje mein

kisī ne dekhā nahīñ iltijā ke lahje meñ

hazār phuul khile the duā ke lahje meñ

jo aadmī hai use aadmī milūñgā maiñ

ḳhudā se baat karūñgā ḳhudā ke lahje meñ

maiñ kohsār pe tesha-ba-dast pahuñchā to

vo shakl bol uThī apsarā ke lahje meñ

ye din dikhā.e hai mujh ko mirī mohabbat ne

ki mujh se baat karo tum ḳhudā ke lahje meñ

na-jāne kaun thā kyā thā magar achānak hī

vo ham-kalām huā ambiyā ke lahje meñ

ye aur baat ki maiñ sun nahīñ sakā varna

diye ne kuchh to kahā thā havā ke lahje meñ

diye haiñ us ko bahut dard is zamāne ne

hazār zaḳhm haiñ pinhāñ 'fidā' ke lahje meñ

kisi ne dekha nahin iltija ke lahje mein

hazar phul khile the dua ke lahje mein

jo aadmi hai use aadmi milunga main

KHuda se baat karunga KHuda ke lahje mein

main kohsar pe tesha-ba-dast pahuncha to

wo shakl bol uThi apsara ke lahje mein

ye din dikhae hai mujh ko meri mohabbat ne

ki mujh se baat karo tum KHuda ke lahje mein

na-jaane kaun tha kya tha magar achanak hi

wo ham-kalam hua ambiya ke lahje mein

ye aur baat ki main sun nahin saka warna

diye ne kuchh to kaha tha hawa ke lahje mein

diye hain us ko bahut dard is zamane ne

hazar zaKHm hain pinhan 'fida' ke lahje mein