kisi ne ek jafa-e-karam-numa kar ke

kisī ne ek jafā-e-karam-numā kar ke

Dubo diyā mujhe sāhil se āshnā kar ke

ġhubār-e-rāh ko maġhrūr-e-irtiqā kar ke

gayā hai kaun zamīñ ko falak-numā kar ke

umīd-e-jashn-e-charāġhāñ bhī chhin ga.ī ham se

kahīñ ke ham na rahe barq ko ḳhafā kar ke

ye vaqt hai ki jafāoñ ko marhabā kahiye

hamesha kaam nikaltā nahīñ gila kar ke

baḌe salīqe se badnām kar diyā tum ko

hamārā zikr raqīboñ ne jā-ba-jā kar ke

azān-e-sub.h se TuuTā ġhamoñ kā sannāTā

guzar ga.ī shab-e-hijrāñ ḳhudā ḳhudā kar ke

mire rafīq ye tahsīn-e-nā-shanās kahīñ

tujhe na chhoḌ de āvāra-e-anā kar ke

shurūa kab ho na jaane nazākatoñ kā safar

maiñ dil ko baiThā huuñ shāyān-e-naqsh-e-pā kar ke

tum un se karte ho kyā zikr-e-zindagī 'jauhar'

jo saañs rok leñ andesha-e-fanā kar ke

kisi ne ek jafa-e-karam-numa kar ke

Dubo diya mujhe sahil se aashna kar ke

ghubar-e-rah ko maghrur-e-irtiqa kar ke

gaya hai kaun zamin ko falak-numa kar ke

umid-e-jashn-e-charaghan bhi chhin gai hum se

kahin ke hum na rahe barq ko KHafa kar ke

ye waqt hai ki jafaon ko marhaba kahiye

hamesha kaam nikalta nahin gila kar ke

baDe saliqe se badnam kar diya tum ko

hamara zikr raqibon ne ja-ba-ja kar ke

azan-e-subh se TuTa ghamon ka sannaTa

guzar gai shab-e-hijran KHuda KHuda kar ke

mere rafiq ye tahsin-e-na-shanas kahin

tujhe na chhoD de aawara-e-ana kar ke

shurua kab ho na jaane nazakaton ka safar

main dil ko baiTha hun shayan-e-naqsh-e-pa kar ke

tum un se karte ho kya zikr-e-zindagi 'jauhar'

jo sans rok len andesha-e-fana kar ke