kisi ne puchha jo umr-e-rawan ke bare mein

kisī ne pūchhā jo umr-e-ravāñ ke baare meñ

to kyā batā.eñge sūd-o-ziyāñ ke baare meñ

harīm-e-dīda-varī ḳhaak uḌ rahī hai mirī

maiñ jāntī thī ġhubār-e-makāñ ke baare meñ

na-jāne kaisī guzartī hai jaane vāloñ par

koī batātā nahīñ raftagāñ ke baare meñ

duā karo ki salāmat rahe mirā pindār

zamīñ pe sochtī huuñ āsmāñ ke baare meñ

na-jāne kitne harīfoñ ke naam yaad aa.e

maiñ likh rahī thī saf-e-dostāñ ke baare meñ

har ek qisse pe dil apnā thaam thaam liyā

jo vāqi.āt sune dāstāñ ke baare meñ

yaqīn kar ki abhī tak hai dil ko tujh pe yaqīñ

ye husn-e-zan hai kisī bad-gumāñ ke baare meñ

fareb-e-sāda-dilī dekh us sitamgar ne

bayān raaz kiyā rāz-dāñ ke baare meñ

kisi ne puchha jo umr-e-rawan ke bare mein

to kya bataenge sud-o-ziyan ke bare mein

harim-e-dida-wari KHak uD rahi hai meri

main jaanti thi ghubar-e-makan ke bare mein

na-jaane kaisi guzarti hai jaane walon par

koi batata nahin raftagan ke bare mein

dua karo ki salamat rahe mera pindar

zamin pe sochti hun aasman ke bare mein

na-jaane kitne harifon ke nam yaad aae

main likh rahi thi saf-e-dostan ke bare mein

har ek qisse pe dil apna tham tham liya

jo waqiat sune dastan ke bare mein

yaqin kar ki abhi tak hai dil ko tujh pe yaqin

ye husn-e-zan hai kisi bad-guman ke bare mein

fareb-e-sada-dili dekh us sitamgar ne

bayan raaz kiya raaz-dan ke bare mein