kisi nishan se alamat se ya sanad se na ho

kisī nishāñ se alāmat se yā sanad se na ho

agar maiñ huuñ to ye honā bhī ḳhāl-o-ḳhad se na ho

maiñ ek aise zamāne meñ basnā chāhtā huuñ

zamāna jis kā ta.alluq azal abad se na ho

mire adū vo haqīqat bhī kyā haqīqat hai

subūt jis kā mayassar usī ke rad se na ho

isī liye to maiñ rakhtā huuñ ḳhushbuoñ sā mizāj

maiñ chāhtā huuñ ki merā shumār had se na ho

banāne vaalā huuñ hāthoñ se apne fardā kā

vo zā.icha jo lakīroñ se yā adad se na ho

vajūd vāhima hai ai badan-nazhād samajh

ye terā saaya bhī shāyad tire jasad se na ho

maiñ apnā aap usī ke supurd kar dūñgā

ik aisā shaḳhs jo amboh-e-nek-o-bad se na ho

kisi nishan se alamat se ya sanad se na ho

agar main hun to ye hona bhi KHal-o-KHad se na ho

main ek aise zamane mein basna chahta hun

zamana jis ka talluq azal abad se na ho

mere adu wo haqiqat bhi kya haqiqat hai

subut jis ka mayassar usi ke rad se na ho

isi liye to main rakhta hun KHushbuon sa mizaj

main chahta hun ki mera shumar had se na ho

banane wala hun hathon se apne farda ka

wo zaicha jo lakiron se ya adad se na ho

wajud wahima hai ai badan-nazhad samajh

ye tera saya bhi shayad tere jasad se na ho

main apna aap usi ke supurd kar dunga

ek aisa shaKHs jo amboh-e-nek-o-bad se na ho