kisi par tabiat ka aana ghazab hai

kisī par tabī.at kā aanā ġhazab hai

ġhazab hai ġhazab dil lagānā ġhazab hai

agar ek din ho to sab kuchh bhugat luuñ

magar roz kā ranj uThānā ġhazab hai

haiñ majbūriyāñ dil kī ḳhud sau tarah kī

ye bekas hai is ko satānā ġhazab hai

shab-e-hijr kā mājrā kuchh na pūchho

na chheḌo ise ye fasāna ġhazab hai

kahīñ vaar ḳhālī bhī jaatā hai us kā

ki tīr-e-nazar kā nishāna ġhazab hai

na himmat paḌegī kisī bul-havas kī

tirā jāñchnā āzmānā ġhazab hai

shab-e-hijr dil kā machalnā sitam hai

tirā vasl meñ ruuTh jaanā ġhazab hai

dimāġh un kā dil le ke kyā pūchhte ho

kisī shai kā muft haath aanā ġhazab hai

vo sharmīlī āñkheñ vo nīchī nigāheñ

vo muñh pher kar muskurānā ġhazab hai

sitam-ḳhez yuuñ to har ik sāneha hai

magar dil kā hāthoñ se jaanā ġhazab hai

'fahīm' ab to bas jaan par aa banī hai

sitam hai sitam dil lagānā ġhazab hai

kisi par tabiat ka aana ghazab hai

ghazab hai ghazab dil lagana ghazab hai

agar ek din ho to sab kuchh bhugat lun

magar roz ka ranj uThana ghazab hai

hain majburiyan dil ki KHud sau tarah ki

ye bekas hai is ko satana ghazab hai

shab-e-hijr ka majra kuchh na puchho

na chheDo ise ye fasana ghazab hai

kahin war KHali bhi jata hai us ka

ki tir-e-nazar ka nishana ghazab hai

na himmat paDegi kisi bul-hawas ki

tera jaanchna aazmana ghazab hai

shab-e-hijr dil ka machalna sitam hai

tera wasl mein ruTh jaana ghazab hai

dimagh un ka dil le ke kya puchhte ho

kisi shai ka muft hath aana ghazab hai

wo sharmili aankhen wo nichi nigahen

wo munh pher kar muskurana ghazab hai

sitam-KHez yun to har ek saneha hai

magar dil ka hathon se jaana ghazab hai

'fahim' ab to bas jaan par aa bani hai

sitam hai sitam dil lagana ghazab hai