kisi parde mein koi jalwa-gar hoga to kya hoga

kisī parde meñ koī jalva-gar hogā to kyā hogā

tahayyur meñ jo ġham zauq-e-nazar hogā to kyā hogā

mohabbat kā agar ulTā asar hogā to kyā hogā

nizām-e-zindagī zer-o-zabar hogā to kyā hogā

dalīl-e-'ām jab hai zindagī meñ inqalāb aanā

tū hī hamdam agar bedād-gar hogā to kyā hogā

patā detī hai har manzil pe ḳhud hī apnī manzil kā

mohabbat meñ na koī rāhbar hogā to gayā hogā

mazāq-e-zauq-e-sajda nā-mukammal rah nahīñ saktā

agar mā'dūm un kā sang-e-dar hogā to kyā hogā

musalsal baḌhtī jaatī hai mohabbat kī tapish dil meñ

batā denā zarā ai chashm-e-tar hogā to kyā hogā

mohabbat jabki fitrat hai to ġham kis baat kā 'rāfat'

balā se dard-e-dil dard-e-jigar hogā to kyā hogā

kisi parde mein koi jalwa-gar hoga to kya hoga

tahayyur mein jo gham zauq-e-nazar hoga to kya hoga

mohabbat ka agar ulTa asar hoga to kya hoga

nizam-e-zindagi zer-o-zabar hoga to kya hoga

dalil-e-'am jab hai zindagi mein inqalab aana

tu hi hamdam agar bedad-gar hoga to kya hoga

pata deti hai har manzil pe KHud hi apni manzil ka

mohabbat mein na koi rahbar hoga to gaya hoga

mazaq-e-zauq-e-sajda na-mukammal rah nahin sakta

agar ma'dum un ka sang-e-dar hoga to kya hoga

musalsal baDhti jati hai mohabbat ki tapish dil mein

bata dena zara ai chashm-e-tar hoga to kya hoga

mohabbat jabki fitrat hai to gham kis baat ka 'rafat'

bala se dard-e-dil dard-e-jigar hoga to kya hoga