kisi pe qahr kisi pe itab ho ke raha

kisī pe qahr kisī pe itaab ho ke rahā

kisī pe lutf tirā be-hisāb ho ke rahā

bhaTak ga.ī thī vo ḳhud-sāḳhta ḳhudāoñ meñ

vo qaum jis pe ḳhudā kā azaab ho ke rahā

vo jis ne chhoḌ diyā us kā dāman-e-rahmat

vahāñ to kyā vo yahāñ bhī ḳharāb ho ke rahā

samīm-e-qalb se kī jis ne ittibā.a-e-rasūl

vo kā.enāt meñ izzat-e-ma.āb ho ke rahā

burā.iyoñ meñ guzārī ho zindagī jis ne

vajūd us kā zamīñ par azaab ho ke rahā

vo ik misāl the apnī shujā.atoñ ke sabab

koī na misl-e-shah-e-bū-turāb ho ke rahā

usī kā faiz hai mujh par usī kā lutf-o-karam

jo muñh se niklā mire vo shitāb ho ke rahā

bichhaḌ ga.e mire sab ham-safar akelā maiñ

ba-nām-e-azm-e-safar kāmyāb ho ke rahā

vo ġharq ālam-e-hairat meñ kyoñ na ho ai 'yās'

maiñ har savāl kā us ke javāb ho ke rahā

kisi pe qahr kisi pe itab ho ke raha

kisi pe lutf tera be-hisab ho ke raha

bhaTak gai thi wo KHud-saKHta KHudaon mein

wo qaum jis pe KHuda ka azab ho ke raha

wo jis ne chhoD diya us ka daman-e-rahmat

wahan to kya wo yahan bhi KHarab ho ke raha

samim-e-qalb se ki jis ne ittibaa-e-rasul

wo kaenat mein izzat-e-maab ho ke raha

buraiyon mein guzari ho zindagi jis ne

wajud us ka zamin par azab ho ke raha

wo ek misal the apni shujaaton ke sabab

koi na misl-e-shah-e-bu-turab ho ke raha

usi ka faiz hai mujh par usi ka lutf-o-karam

jo munh se nikla mere wo shitab ho ke raha

bichhaD gae mere sab ham-safar akela main

ba-nam-e-azm-e-safar kaamyab ho ke raha

wo gharq aalam-e-hairat mein kyon na ho ai 'yas'

main har sawal ka us ke jawab ho ke raha