kisi se hath kisi se nazar milate hue

kisī se haath kisī se nazar milāte hue

maiñ bujh rahī huuñ ravā-dāriyāñ nibhāte hue

kisī ko mere dukhoñ kī ḳhabar bhī kaise ho

ki maiñ har ek se miltī huuñ muskurāte hue

ajiib ḳhauf hai andar kī ḳhāmushī kā mujhe

ki rāstoñ se guzartī huuñ gungunāte hue

kahāñ tak aur maiñ simTūñ ki umr biit ga.ī

dil o nazar ke taqāzoñ se muñh chhupāte hue

nahīñ malāl ki maiñ rā.egāñ huī huuñ 'nūr'

badan kī ḳhaak se dīvār-o-dar banāte hue

kisi se hath kisi se nazar milate hue

main bujh rahi hun rawa-dariyan nibhate hue

kisi ko mere dukhon ki KHabar bhi kaise ho

ki main har ek se milti hun muskuraate hue

ajib KHauf hai andar ki KHamushi ka mujhe

ki raston se guzarti hun gungunate hue

kahan tak aur main simTun ki umr bit gai

dil o nazar ke taqazon se munh chhupate hue

nahin malal ki main raegan hui hun 'nur'

badan ki KHak se diwar-o-dar banate hue