kisi se kar ke shayad aaj wo takrar baiThe hain

kisī se kar ke shāyad aaj vo takrār baiThe haiñ

jo muñh phere hue vo jānib-e-dīvār baiThe haiñ

udhar vo haiñ ki jo tole hue talvār baiThe haiñ

idhar ham haiñ ki apnī ziist se bezār baiThe haiñ

are vaa.e zamāna tafraqa-andāz hai kyā kyā

idhar do-chār baiThe haiñ udhar do-chār baiThe haiñ

bigaḌtā hai bigaḌ jaa.e sudhartā hai sudhar jaa.e

tirī chaukhaT pe dīvāne muqaddar haar baiThe haiñ

zabāñ se kuchh nahīñ kahte magar sab kuchh samajhte haiñ

inheñ dīvāna mat samjho ye sab hushiyār baiThe haiñ

ḳhudā kā shukr hai 'ejāz' puurī ho ga.ī manzil

hazāroñ baar uTThe haiñ hazāroñ baar baiThe haiñ

kisi se kar ke shayad aaj wo takrar baiThe hain

jo munh phere hue wo jaanib-e-diwar baiThe hain

udhar wo hain ki jo tole hue talwar baiThe hain

idhar hum hain ki apni zist se bezar baiThe hain

are wae zamana tafraqa-andaz hai kya kya

idhar do-chaar baiThe hain udhar do-chaar baiThe hain

bigaDta hai bigaD jae sudharta hai sudhar jae

teri chaukhaT pe diwane muqaddar haar baiThe hain

zaban se kuchh nahin kahte magar sab kuchh samajhte hain

inhen diwana mat samjho ye sab hushiyar baiThe hain

KHuda ka shukr hai 'ejaz' puri ho gai manzil

hazaron bar uTThe hain hazaron bar baiThe hain