kisi se koi KHafa bhi nahin raha ab to

kisī se koī ḳhafā bhī nahīñ rahā ab to

gilā karo ki gilā bhī nahīñ rahā ab to

vo kāhisheñ haiñ ki aish-e-junūñ to kyā ya.anī

ġhurūr-e-zehn-e-rasā bhī nahīñ rahā ab to

shikast-e-zāt kā iqrār aur kyā hogā

ki idda.a-e-vafā bhī nahīñ rahā ab to

chune hue haiñ laboñ par tire hazār javāb

shikāyatoñ kā maza bhī nahīñ rahā ab to

huuñ mubtalā-e-yaqīñ merī mushkileñ mat pūchh

gumān-e-uqda-kushā bhī nahīñ rahā ab to

mire vajūd kā ab kyā savāl hai ya.anī

maiñ apne haq meñ burā bhī nahīñ rahā ab to

yahī atiyya-e-sub.h-e-shab-e-visāl hai kyā

ki sehr-e-nāz-o-zadā bhī nahīñ rahā ab to

yaqīn kar jo tirī aarzū meñ thā pahle

vo lutf tere sivā bhī nahīñ rahā ab to

vo sukh vahāñ ki ḳhudā kī haiñ baḳhshisheñ kyā kyā

yahāñ ye dukh ki ḳhudā bhī nahīñ rahā ab to

kisi se koi KHafa bhi nahin raha ab to

gila karo ki gila bhi nahin raha ab to

wo kahishen hain ki aish-e-junun to kya yani

ghurur-e-zehn-e-rasa bhi nahin raha ab to

shikast-e-zat ka iqrar aur kya hoga

ki idda-e-wafa bhi nahin raha ab to

chune hue hain labon par tere hazar jawab

shikayaton ka maza bhi nahin raha ab to

hun mubtala-e-yaqin meri mushkilen mat puchh

guman-e-uqda-kusha bhi nahin raha ab to

mere wajud ka ab kya sawal hai yani

main apne haq mein bura bhi nahin raha ab to

yahi atiyya-e-subh-e-shab-e-visal hai kya

ki sehr-e-naz-o-zada bhi nahin raha ab to

yaqin kar jo teri aarzu mein tha pahle

wo lutf tere siwa bhi nahin raha ab to

wo sukh wahan ki KHuda ki hain baKHshishen kya kya

yahan ye dukh ki KHuda bhi nahin raha ab to