kisi surat kami hoti nahin soz-e-nihani mein

kisī sūrat kamī hotī nahīñ soz-e-nihānī meñ

mirī duniyā bahī jaatī hai ashkoñ kī ravānī meñ

navā-sanj-e-fuġhāñ ai bāġhbāñ ye bulbuleñ kyoñ haiñ

bahār aa.ī hai kaisī tere daur-e-bāġhbānī meñ

ḳhirad vaalo idhar aao yahāñ baiTho mujhe dekho

ki kaisā mutma.in huuñ maiñ junūñ kī hukmrānī meñ

mirā ḳhūn-e-tamannā ḳhūn-e-dil ḳhūn-e-vafā le kar

jo rang-āmeziyāñ chāho karo apnī kahānī meñ

tapish se dil kī lau dene lage aañsū sar-e-mizhgāñ

tamāshā dekh lo aakar lagī hai aag paanī meñ

abhī kuchh phīkī phīkī sī hai rūdād-e-ġham-e-jānāñ

vo sun leñge to jaan aa jā.egī puurī kahānī meñ

kahāñ kā husn kaisā ishq itnā yaad hai mujh ko

ki ik uljhā huā sā ḳhvāb dekhā thā javānī meñ

na jaane kyoñ mujhe vo apnā dīvāna samajh baiThe

jab un kā naam tak aayā na thā merī kahānī meñ

kisi surat kami hoti nahin soz-e-nihani mein

meri duniya bahi jati hai ashkon ki rawani mein

nawa-sanj-e-fughan ai baghban ye bulbulen kyon hain

bahaar aai hai kaisi tere daur-e-baghbani mein

KHirad walo idhar aao yahan baiTho mujhe dekho

ki kaisa mutmain hun main junun ki hukmrani mein

mera KHun-e-tamanna KHun-e-dil KHun-e-wafa le kar

jo rang-ameziyan chaho karo apni kahani mein

tapish se dil ki lau dene lage aansu sar-e-mizhgan

tamasha dekh lo aakar lagi hai aag pani mein

abhi kuchh phiki phiki si hai rudad-e-gham-e-jaanan

wo sun lenge to jaan aa jaegi puri kahani mein

kahan ka husn kaisa ishq itna yaad hai mujh ko

ki ek uljha hua sa KHwab dekha tha jawani mein

na jaane kyon mujhe wo apna diwana samajh baiThe

jab un ka nam tak aaya na tha meri kahani mein