kisi surat se mere dil ki virani nahin jati

kisī sūrat se mere dil kī vīrānī nahīñ jaatī

galī meñ zindagī kī ḳhaak ab chhānī nahīñ jaatī

ye mere dil kā dariyā bhī ajab dariyā-e-vahshat hai

utar jaatā hai lekin is kī tuġhyānī nahīñ jaatī

vahī chehre vahī ghar haiñ magar kitnā taġhayyur hai

vahī bastī hai aur āñkhoñ se pahchānī nahīñ jaatī

kabhī ābād hone ko taras jaatā hai shahr-e-dil

kabhī ābād hone par bhī vīrānī nahīñ jaatī

ḳhatā se baḌh ke ehsās-e-ḳhatā ne kar diyā ḳhasta

pashemāñ ho ke bhī dil kī pashemānī nahīñ jaatī

shaguft-e-gul kā matlab hai fanā-e-zāt to phir kyoñ

guloñ kī ārzū-e-chāk-dāmānī nahīñ jaatī

abhī to aur khā.egā fareb-e-dostāñ 'ahmad'

ye duniyā hai ye āsānī se pahchānī nahīñ jaatī

kisi surat se mere dil ki virani nahin jati

gali mein zindagi ki KHak ab chhani nahin jati

ye mere dil ka dariya bhi ajab dariya-e-wahshat hai

utar jata hai lekin is ki tughyani nahin jati

wahi chehre wahi ghar hain magar kitna taghayyur hai

wahi basti hai aur aankhon se pahchani nahin jati

kabhi aabaad hone ko taras jata hai shahr-e-dil

kabhi aabaad hone par bhi virani nahin jati

KHata se baDh ke ehsas-e-KHata ne kar diya KHasta

pasheman ho ke bhi dil ki pashemani nahin jati

shaguft-e-gul ka matlab hai fana-e-zat to phir kyon

gulon ki aarzu-e-chaak-damani nahin jati

abhi to aur khaega fareb-e-dostan 'ahmad'

ye duniya hai ye aasani se pahchani nahin jati