kisi tah se ubharta ja raha hun

kisī tah se ubhartā jā rahā huuñ

kuaañ paanī se bhartā jā rahā huuñ

chamak uTThegī thoḌī der meñ sub.h

fazā tasvīr kartā jā rahā huuñ

yahāñ paanī taḌap uTThegā shāyad

koī dahshat hai Dartā jā rahā huuñ

mirī nīlāhaTeñ bhī haiñ abad-zā

falak-ūpar bikhartā jā rahā huuñ

ye kin hāthoñ meñ maiñ aayā huā huuñ

ye kin logoñ meñ bartā jā rahā huuñ

kisī ke āsmāñ kā chāñd huuñ maiñ

muñDeroñ par utartā jā rahā huuñ

havā huuñ aur nazar aatā nahīñ huuñ

‘ilāqoñ se guzartā jā rahā huuñ

kisī kā husn-e-dil-afroz huuñ maiñ

so aa.e din nikhartā jā rahā huuñ

koī khilne kī bār-āvar ghaḌī hai

qabāoñ ko katartā jā rahā huuñ

kisi tah se ubharta ja raha hun

kuan pani se bharta ja raha hun

chamak uTThegi thoDi der mein subh

faza taswir karta ja raha hun

yahan pani taDap uTThega shayad

koi dahshat hai Darta ja raha hun

meri nilahaTen bhi hain abad-za

falak-upar bikharta ja raha hun

ye kin hathon mein main aaya hua hun

ye kin logon mein barta ja raha hun

kisi ke aasman ka chand hun main

munDeron par utarta ja raha hun

hawa hun aur nazar aata nahin hun

‘ilaqon se guzarta ja raha hun

kisi ka husn-e-dil-afroz hun main

so aae din nikharta ja raha hun

koi khilne ki bar-awar ghaDi hai

qabaon ko katarta ja raha hun