kisi tarah bhi wo takmil-e-muddaa karte

kisī tarah bhī vo takmīl-e-mudda.ā karte

vafā kī ḳhū jo nahīñ thī to phir jafā karte

adā-e-husn to tālib hai jāñ-sipārī kī

kalīm kaise tajallī kā sāmnā karte

tamām umr ḳhudā se yahī duā māñgī

vo din bhī aatā jo vo mujh se iltijā karte

hameñ kisī kī talab kā bharam to rakhnā thā

jo ham ye jaan na dete to aur kyā karte

faqat tahaffuz-e-kashtī kā dhyān thā varna

ham aur minnat-e-ehsān-e-nāḳhudā karte

zarā batā.eñ jo furqat meñ ham pe biit ga.ī

ye vaqt aap pe paḌtā to aap kyā karte

maiñ un ke lab kī duā kā uThā.ūñ kyoñ ehsān

jo dekhne ko na aa.e vo kyā duā karte

vafā hai aaj bhī hal-mim-mazīd kī tālib

'habīb' mar ga.e kitne vafā vafā karte

kisi tarah bhi wo takmil-e-muddaa karte

wafa ki KHu jo nahin thi to phir jafa karte

ada-e-husn to talib hai jaan-sipari ki

kalim kaise tajalli ka samna karte

tamam umr KHuda se yahi dua mangi

wo din bhi aata jo wo mujh se iltija karte

hamein kisi ki talab ka bharam to rakhna tha

jo hum ye jaan na dete to aur kya karte

faqat tahaffuz-e-kashti ka dhyan tha warna

hum aur minnat-e-ehsan-e-naKHuda karte

zara bataen jo furqat mein hum pe bit gai

ye waqt aap pe paDta to aap kya karte

main un ke lab ki dua ka uThaun kyon ehsan

jo dekhne ko na aae wo kya dua karte

wafa hai aaj bhi hal-mim-mazid ki talib

'habib' mar gae kitne wafa wafa karte