kisi tarah se ghira main kuchh bad-duaon mein hun

kisī tarah se ghirā maiñ kuchh bad-duāoñ meñ huuñ

mujhe zarūrat hai dhuup kī aur maiñ chhāñv meñ huuñ

buroñ se merī faqat sazā meñ mushābahat hai

gunāh-e-nā-karda kī phañsā maiñ sazāoñ meñ huuñ

koī samajh paa.e merī uljhan to hal batā.e

juḌā huuñ shahr-e-fitan se uljhā maiñ gaañv meñ huuñ

kabhī jo merī masāfatoñ kā hisāb karnā

shumār karnā rukā maiñ kitnā sarāoñ meñ huuñ

maiñ gum-shuda huuñ tirā munādī ne hai batāyā

mujhe ḳhushī hai abhī maiñ terī sadāoñ meñ huuñ

vafā kī rāhoñ meñ bichh gayā thā maiñ terī ḳhātir

shumār hone lagā maiñ kyoñ be-vafāoñ meñ huuñ

jinhoñ ne palkoñ pe thā biThānā mujhe 'mudassir'

dabā huā āj-kal unhī ke maiñ paañv meñ huuñ

kisi tarah se ghira main kuchh bad-duaon mein hun

mujhe zarurat hai dhup ki aur main chhanw mein hun

buron se meri faqat saza mein mushabahat hai

gunah-e-na-karda ki phansa main sazaon mein hun

koi samajh pae meri uljhan to hal batae

juDa hun shahr-e-fitan se uljha main ganw mein hun

kabhi jo meri masafaton ka hisab karna

shumar karna ruka main kitna saraon mein hun

main gum-shuda hun tera munadi ne hai bataya

mujhe KHushi hai abhi main teri sadaon mein hun

wafa ki rahon mein bichh gaya tha main teri KHatir

shumar hone laga main kyon be-wafaon mein hun

jinhon ne palkon pe tha biThana mujhe 'mudassir'

daba hua aaj-kal unhi ke main panw mein hun